Հայաստանի և Ադրբեջանի միջև հակամարտությունը հիմնականում լուծված է, մնացել են գործնական քայլեր՝ ուղղված հարաբերությունների ամբողջական կարգավորմանը: Այս մասին հայտարարել է ՌԴ ԱԳ նախարար Սերգեյ Լավրովը Թեհրանում «3+3» ձևաչափով արտգործնախարարների հանդիպումից հետո:
«Երկու կողմերն էլ համաձայնվեցին, որ Ղարաբաղը պատկանում է Ադրբեջանին, իսկ դա գլխավոր չլուծված խնդիրն էր»,-ընդգծել է Լավրովը:
Անդրադառնալով Հայաստանի և Ադրբեջանի միջև սահմանազատման խնդրին՝ Ռուսաստանի ԱԳ նախարարն ասել է, որ Բրյուսելը, Վաշինգտոնը շարունակում են գործընթացին ընդգրկվելու փորձերը: «Վերջին 1 տարում եղել են սահմանազատման գործընթացին ընդգրկվելու փորձեր, առաջին հերթին՝ Եվրամիության կողմից»,-ասել է Լավրովը:
Նա միևնույն ժամանակ ընդգծել է, որ Մոսկվան պատրաստ է գործնականում աջակցել Ադրբեջանի և Հայաստանի միջև սահմանազատման գործընթացի մեկնարկին։
Կարդացեք նաև
«Բոլոր փորձագետներին քաջ հայտնի է, որ այն ամենը, ինչ անհրաժեշտ է սահմանազատման վերաբերյալ քննարկելու և համաձայնեցնելու համար, այդ թվում՝ առաջին հերթին խորհրդային ժամանակներից մնացած քարտեզները, գտնվում են Ռուսաստանի Դաշնության ձեռքում։ Գործընկերները դա հասկանում են: Մենք չենք փորձում դրանից մեծ խնդիր սարքել: Թող նրանք իրենց բախտը փորձեն Բրյուսելում, բայց մենք միշտ պատրաստ ենք իսկապես օգնել սկսելու իրական սահմանազատում»,- ասել է ՌԴ ԱԳ նախարարը։
Լավրովը նաև ասել է, որ «3+3» ձևաչափով հաջորդ հանդիպումը տեղի կունենա Թուրքիայում 2024թ. առաջին կեսին:
