Այսօր ԱԺ-ում լրագրողների հետ ճեպազրույցում ՀՀ ԱԳ փոխնախարար Վահան Կոստանյանն ասաց, որ Արարատ Միրզոյանը Թեհրանից ստացել է հանդիպման հրավեր «3+3» ձեւաչափով: Թե ի՞նչ օրակարգով է մասնակցելու Արարատ Միրզոյանը կամ մասնակցելո՞ւ է՝ դեռ որոշում չկա. «Հրավերն ուղղվել է Հարավային Կովկասի 3 պետություններին՝ Հայաստանի, Վրաստանի եւ Ադրբեջանի ԱԳ նախարարներին: Ֆորմատը ենթադրում է նաեւ Թուրքիայի, Ռուսաստանի եւ Իրանի ներկայացուցիչների մասնակցություն»:
Այն, որ Ալիեւը արեւմտյան ձեւաչափերով հանդիպումներին չի մասնակցում, ըստ Վահան Կոստանյանի, կասկածի տակ է դնում՝ արդյոք Բաքուն հետաքրքրվա՞ծ է առհասարակ խաղաղության պայմանագիր կնքելով, թե՞ ուղղակի մի ձեւաչափից մյուսն է փորձում անցնել եւ այդպես էլ կոնկրետ պայմանավորվածություններից խուսափել:
Հարցին՝ ՀՀ ԱԳՆ-ն ինչպես է պատկերացնում արցախահայերի իրավունքների պաշտպանությունը՝ Կոստանյանն ասաց. «Ես կարծում եմ, որ վերադարձի իրավունքի ապահովումը ոչ միայն ՀՀ կառավարության, այլեւ ընդհանուր միջազգային հանրության, մասնավորապես, ՄԱԿ-ի Անվտանգության խորհրդի պարտականությունների մեջ է մտնում եւ ՀՀ ԱԳ-ն ԼՂ բնակիչների իրավունքների պաշտպանության ուղղությամբ աշխատանքներ իրականացնում է»:
Հարցին՝ Եվրոպական խորհրդարանում վարչապետ Նիկոլ Փաշինյանի ելույթը ռուսական աղբյուրները համարել են սադրիչ եւ հայտարարել, որ Փաշինյանը գնում է Զելենսկու ճանապարհով, ինչպե՞ս կմեկնաբանեք՝ Կոստանյանը պատասխանեց. «Չեմ կարծում, որ անանուն աղբյուրները մեկնաբանելու կարիք կա: Մեր ռուսաստանցի գործընկերները նման հաղորդագրություն պաշտոնական խողովակներով մեզ չեն փոխանցել: ՀՀ վարչապետի ելույթը Եվրախորհրդարանում ամբողջությամբ արտացոլում է ՀՀ ազգային շահերը, դուր կգա դա ոմանց, թե ոչ՝ դա արդեն իրենց խնդիրն է»:
Կարդացեք նաև
Հռիփսիմե ՋԵԲԵՋՅԱՆ
