Երեւան քաղաքի առաջին ատյանի ընդհանուր իրավասության քրեական դատարանի Աջափնյակ-1 նստավայրում դատավոր Արամայիս Ասատրյանի նախագահությամբ սոցիոլոգ, ադրբեջանագետ Արմինե Ադիբեկյանի գործով դատական նիստն, ըստ էության, չկայացավ հայցվորի չներկայանալու պատճառով: Հաջորդ նիստը նշանակվեց նոյեմբերի 7-ին ժամը 13:00-ին:
Արմինե Ադիբեկյանի շահերի ներկայացուցիչ փաստաբան Ռուբեն Մելիքյանն Aravot. am-ին այս վարույթի կապակցությամբ ասաց. «Արմինե Ադիբեկյանին մեղադրում են 2022 թվականի սեպտեմբերին իր ՖԲ էջում կատարած հետեւյալ արտահայտության համար, մեջբերում եմ. «Եթե Փաշինյանը չդիմի Հիտլերի վերջին քայլին, ապա նրան սպասում է Գեբելսի ճակատագիրը»: Այս արտահայտությունն է մեղադրանքի հիմքում, որին ես տվել եմ «Գեբելսի վախճան» պայմանական անունը: Մեղադրանքում հստակ մեկնաբանված էլ չէ, թե ինչ նկատի ունի մեղադրանքի կողմը: Ենթադրում ենք, որ կապված է ինքնասպանության գործոնի հետ, որովհետեւ առնվազն պատմական փաստ է, որ թե Հիտլերը, թե Գեբելսը իրենց կյանքն ավարտել են ինքնասպանությամբ: Իհարկե, մենք այս ենթադրությունը դատական նիստերի ժամանակ կճշտենք:
Մեր պատկերացմամբ սա, մեղմ ասած, տարօրինակ վարույթ է հատկապես վերջին երկու-երեք շաբաթների հանրային կյանքի լույսի ներքո՝ հաշվի առնելով այն, որ քպականները բացեիբաց, շատ ուղիղ եւ ոչ թե պատմական զուգահեռներ անցկացնելով, բռնության կամ նույնիսկ ինքնասպանության են դրդում հատկապես Արցախի տարբեր պաշտոնյաներին: Ու որեւէ վարույթ հարուցված չէ: Օրինակ, ես շատ հստակ հիշում եմ՝ այդպիսի ուղիղ արտահայտություն արեց քպական պատգամավոր Անդրանիկ Քոչարյանը, բավական մոտ արտահայտություն արեց քպական քարոզիչ Մեհրաբյանը:
Սա է մեղադրանքի հիմքում ընկած հանգամանքը, եւ մենք պատրաստվում ենք հիմնավորել, որ տիկին Ադիբեկյանի պարագայում հանցակազմի նշույլ անգամ չկա եւ Գեբելսի տխրահռչակ գործը կունենա նույնքան տխրահռչակ ավարտ, ինչպես եւ Գեբելսն ինքը»:
Կարդացեք նաև
Անդրադառնալով այսօրվա դատական նիստի, ըստ էության, չկայանալուն՝ փաստաբանը նշեց. «Կարծում եմ, հարգալից վերաբերմունքը դատավարության մասնակիցների միջեւ եւ դատարանի նկատմամբ պարտադիր, կամ կարեւորագույն նախապայման է, որը նաեւ ենթադրում է, որ եթե հրատապ պատճառ չի առաջացել դատական նիստին չներկայանալու համար, առնվազն պետք է մեկ օր առաջ տեղեկացնել, որպեսզի դատարանն էլ հնարավորություն ունենա մյուս կողմին տեղեկացնել: Այսօր մենք գալիս, ժամը 10:00-ին հասնում ենք դատարան ու պարզվում է, որ մի քանի րոպե առաջ դատախազը գրություն է ուղարկել դատարան, որ դասընթացների է մասնակցում Արդարադատության ակադեմիայում: Այո, այնտեղ դասընթացների մասնակցելը հարգելի պատճառ է: Ինքս երբեմն դասընթացներ եմ ունենում որպես դասախոս եւ ժամանակին դատարանին տեղյակ եմ պահում դատական նիստը հետաձգելու խնդրանքով: Բայց խնդիրն այն է, թե ինչու է տեղեկանքը ներկայացվել դատական նիստից րոպեներ առաջ, այն էլ այն դեպքում, երբ այդ պատճառն առաջացել է վաղուց: Ես Արդարադատության ակադեմիայի առաջին ռեկտորն եմ, եւ իմ տեղեկությամբ՝ այս ընթացքում ոչինչ չի փոխվել. Դասընթացները տեղի են ունենում երկուշաբթիից ուրբաթ օրերին: Այսօր հինգշաբթի է: Այնպես որ, կարելի էր տեղեկացնել մեկ օր առաջ, որպեսզի իզուր տեղը մենք չգայինք ու դատական նիստ չանեինք:
Մենք անհամբերությամբ ենք սպասում այս դատական վարույթին եւ ունենք շատ հետաքրքիր ռազմավարություն: Ամեն ինչ անելու ենք, որպեսզի «Գեբելսի տխրահռչակ գործն ունենա տխրահռչակ Գեբելսի ճակատագիրը»,-ասաց Ռուբեն Մելիքյանը:
Աշոտ ՀԱԿՈԲՅԱՆ
