Հարավային Կովկասում տրանսպորտային հաղորդակցությունների ապաշրջափակումը հայ-ադրբեջանական հարաբերությունների կարգավորման առանցքային տարրն է։ Այս մասին Trend ադրբեջանական գործակալությանը տված հարցազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Զախարովայի խոսքով՝ հայ-ադրբեջանական հարաբերությունների կարգավորման հարցով զբաղվում է եռակողմ աշխատանքային խումբը՝ Ռուսաստանի, Ադրբեջանի և Հայաստանի փոխվարչապետերի մակարդակով։
«Այսօրվա դրությամբ 12 նիստ է անցկացվել, մանրամասն քննարկվել է երկաթուղային և ավտոմոբիլային երթուղիների փաթեթը։ Ընդհանուր փոխըմբռնում է ձեռք բերվել Երասխ-Ջուլֆա-Մեղրի-Հորադիզ երթուղով երկաթուղային հաղորդակցության վերականգնման և կազմակերպման կոնկրետ քայլերի իրականացման վերաբերյալ: Մեր աշխատանքում մենք ելնում ենք փոխադարձության, հարգանքի սկզբունքների պահպանման անհրաժեշտությունից ու երկու երկրների ինքնիշխանության իրավասությունից»,- հավելել է Զախարովան։
Նա միևնույն ժամանակ ընդգծել է, որ հաղորդակցությունների ապաշրջափակման հարցում ձեռք բերված հաջողությունը խթան կհանդիսանա եռակողմ աշխատանքային խմբի մյուս ուղղությունների համար, խոսքը, մասնավորապես, Հայաստանի և Ադրբեջանի միջև խաղաղության համաձայնագրի պատրաստման, սահմանազատման, ինչպես նաև երկու երկրների հասարակական գործիչների, խորհրդարանականների միջև երկխոսության մեկնարկի մասին է։
Կարդացեք նաև
