Սահմանադրական դատարանի աշխատակազմի նախկին ղեկավար, Լեհաստանում ՀՀ նախկին դեսպան Էդգար Ղազարյանը «Հայելի» ակումբի ուղիղ եթերում անդրադառնալով վերջին օրերին տեղի ունեցած կարեւորագույն իրադարձություններին՝ առանձնացրեց Իլհամ Ալիեւի այցը Ստեփանակերտ:
«44-օրյա պատերազմից հետո Նիկոլ Փաշինյանը ոչ մի անգամ չի այցելել Ստեփանակերտ: Ավելին, պաշտոնազրկել է բոլոր այն պաշտոնյաներին, որոնք համարձակվել են Արցախ գնալ: Դրա մասին հայտարարություն արեց նաեւ պաշտպանության նախկին նախարար Արշակ Կարապետյանը՝ ասելով, որ իր պաշտոնանկության պատճառներից մեկը եղել է Արցախ կատարած այցելությունը: Իմիջիայլոց, Արցախ կատարած այցելության համար պաշտոնազրկվել է նաեւ այն ժամանակ արտաքին գործերի նախարարի պաշտոնակատար Արա Այվազյանը: Նա չնայած պաշտոնակատար էր, բայց նույնիսկ պաշտոնակատարի պաշտոնից ազատվեց Արցախ կատարած այցելության համար:
Բայց Իլհամ Ալիեւը այս ընթացքում հերթով գնացել է Արցախի բոլոր օկուպացված տարածքներ՝ Շուշի, Վարանդա, Մեխակավան, Ակնա, Քարվաճառ, Բերձոր ու վերջը հասավ մինչեւ Ստեփանակերտ:
Հիմա ես ուզում եմ հասկանալ, թե նոյեմբերի 9-ին ինչ ենք արձանագրել, ինչ կետի վրա էինք կանգնել եւ այսօր ինչ իրողություն ունենք: Դա բանակցային գործընթացի, մեր տեսանկյունից՝ տապալման, նրա տեսանկյունից՝ հստակ կազմակերպված ժամանակացույցով գործողություն էր: Իլհամ Ալիեւը Ստեփանակերտում ի՞նչ էր ասում: Ասում էր. «Մենք որ 2020-ին չմտանք Ստեփանակերտ, շատերը մեզ մեղադրում էին, ասում, թե ինչի՞ միանգամից չգրավեցինք Ստեփանակերտը: Այնինչ. մենք հստակ, հաստատուն քայլերով ենք մեր գործողությունները իրականացնում»:
Կարդացեք նաև
Որեւէ մեկը թող չմտածի, որ Իլհամ Ալիեւի ծրագրերն արդեն ավարտվել են՝ մտել է Ստեփանակերտ եւ Արցախի նախագահի աշխատասենյակ: Ոչ: Իլհամ Ալիեւն ասում է, որ «Զանգեզուրի միջանցք» եզրույթը ոչ մի տեղ նշված չէ, ասում է, որ դրա հեղինակն ինքն է, ինքն է ստեղծել՝ հաշվի առնելով հետպատերազմյան իրողությունները: 2020 թվականին որեւէ մեկը խոսո՞ւմ էր Հայաստանից տարածքներ զիջելու, անկլավների մասին: Դա հիմա է, չէ՞, եկել օրակարգ:
Այն կադրերը, որ մենք տեսել ենք հոկտեմբերի 15-ին, որը նույնպես պատահական օր չէ, հոր կողմից իշխանություն ստանալու 20-ամյակի օրն է, նույն ձեւով՝ դրոշն անարգելով, ինքը հայտնվելու է Երեւանում, եթե շարունակի Հայաստանում իշխանության ղեկին մնալ իր լիազոր ներկայացուցիչը իր փոքր հանցախմբով»,- ասաց Էդգար Ղազարյանը:
Աշոտ ՀԱԿՈԲՅԱՆ
