2024 թվականի ԱՄՆ նախագահական ընտրությունների արմատներով հնդիկ մասնակից, հանրապետական թեկնածու Վիվեկ Ռամասվամին արտաքին քաղաքականության իր տեսլականի մասին լրագրող Թաքըր Քարլսոնին տված հարցազրույցում անդրադարձ է կատարել արցախահայության բռնի տեղահանմանը և Արևմուտքի բնակիչների կողմից այս հանցագործության թերի իմացությանը: Նշելով Ուկրաինայի դեմ ռուսական ագրեսիայի մասին՝ նա պնդել է, որ Ուկրաինան և Ադրբեջանն ԱՄՆ-ում հզոր լոբբի ունեն, իսկ Հայաստանը՝ ոչ:
«Տեսեք, թե ինչ է կատարվում Հայաստանի և Ադրբեջանի միջև: Ինչո՞ւ չենք լսում սրա մասին: Որովհետև Վաշինգտոնում Ադրբեջանի լոբբին նույնքան արդյունավետորեն է գործում, որքան Ուկրաինայինը:
Լրագրողը խնդրել է թեմային անծանոթ հեռուստադիտողների համար բացատրել, թե ինչ է տեղի ունենում Հայաստանի և Ադրբեջանի միջև:
«Կատարվողը ոճրագործություն է: 100.000-120.000 քրիստոնյա հայեր քշվում են Հայաստան մի տարածքից, որը նրանց համար տուն է եղել շատ երկար ժամանակ: Ոճրագործությունների զգալի հատվածը դեռևս չլուսաբանված է մնում արևմտյան մեդիայում,» – փաստել է քաղաքական գործիչը:
Կարդացեք նաև
Վիվեկ Ռամասվամին շարունակել է. «Վաշինգտոնում ադրբեջանական հզոր լոբբին կափարիչ է դրել այս թեմայի վրա: Այն պատշաճ չի լուսաբանվում, ինչի պատճառով էլ շատ ամերիկացիներ այս խնդրի մասին երբևէ չեն լսել»:
«Անվերջորեն լսում ենք Ուկրաինա Ռուսաստանի ներթափանցման մասին և «ճիշտ կողմի» կողքին կանգնելու անհրաժեշտության մասին: Նախ, ես մերժում եմ այն միտքը, թե Ուկրաինան առանձնակի լավն է, բայց նույնիսկ եթե այդպես լիներ, ինչու պետք է մի դեպքում բարոյական վրդովմունք ունենալ, իսկ մյուս դեպքում, որը տեղի է ունենում աշխարհագրորեն Ռուսաստանին մոտ գտնվող ևս մեկ տարածքում, չունենալ», – շեշտում է նա:
Ըստ հանրապետական թեկնածուի՝ բարոյական վրդովմունքներն առկա են ամբողջ աշխարհում, բայց ճանաչում են ստանում միայն նրանք, որոնք մեդիայի և երկու կուսակցություններում առկա հաստատությունների կողմից համապատասխան են համարվում ամերիկյան հասարակության համար:
Նախագահի թեկնածուն հավելել է, որ հենց այս խնդիրները լուծելու համար է դրել իր թեկնածությունը: Ըստ Ռամասվամիի՝ թե՛ հանրապետականները, թե՛ դեմոկրատները, տարբեր լոբբիստների ազդեցությամբ են գործում:
«ԱՄՆ-ին այնպիսի առաջնորդներ են հարկավոր, որոնք կդատապարտեն աշխարհի ցանկացած կետում կատարվող ոճրագործությունները», – ընդգծել է նա:
Ռամասվամին, որը 38 տարեկան բիզնեսմեն է և նոր է մեկնարկել քաղաքական կարիերան, հայտարարում է, որ քաղաքականություն է մտնում «գնված և կառավարվող» համակարգին վերջ տալու համար:
Ep. 29 After the Hamas attacks, what’s the wise path forward? pic.twitter.com/AwWkcLFUBb
— Tucker Carlson (@TuckerCarlson) October 9, 2023
Արսեն ԱՅՎԱԶՅԱՆ
