Հեռուստատեսության եւ ռադիոյի հանձնաժողովի նախագահ Տիգրան Հակոբյանի ֆեյսբուքյան գրառումը՝ ՀՌՀ-ի մոտ «Ազգային ժողովրդավարական բեւեռի» ներկայացուցիչների բողոքի ցույցի մասին, առիթ դարձավ փաստաբան Արսեն Բաբայանի հետ «հաշիվներ մաքրելու»:
Փաստաբան Արսեն Բաբայանը հրապարակեց իր եւ Տիգրան Հակոբյանի անձնական զրույցից հատված, որտեղ Տիգրան Հակոբյանը վիրավորում է Արսեն Բաբայանին:
Aravot.am-ի հետ զրույցում Արսեն Բաբայանը մանրամասնեց. «Այդ գրառման տակ հարց էի տվել՝ դուք կաշկանդված չե՞ք քաղաքական զսպվածության շապիկով` ինչ-որ տեղ ակնկալելով նաեւ պատասխան, որովհետեւ կարող է ՀՌՀ նախագահը կաշկանդված չէ: Անկեղծ, օրենքը չեմ նայել ու չգիտեի:
Իրեն պահեց իսկական նիկոլականին վայել: Ինչպես եւ մնացած բոլոր նիկոլականների վարքը վերջին շրջանում, շատ ագրեսիվ է դարձել: Նրանք, հավանաբար, տառապում են անպատժելիության սինդրոմով, որի հնարավորությունն այս իշխանությունը նրանց տվել է»:
Կարդացեք նաև
Արսեն Բաբայանը համոզված է, որ Տիգրան Հակոբյանի վարքը, որպես հանրային պաշտոն զբաղեցնող անձի, պետք է քննության առարկա դառնա առնվազն Հակակոռուպցիոն խորհրդի կողմից: Ուսումնասիրելուց հետո եթե գտնի, որ անհրաժեշտություն կա, ինչ-որ բան կձեռնարկի:
Իսկ Տիգրան Հակոբյանը չի մեկնաբանում եղածը. ասաց՝ «No comment»:
Aravot.am-ին հայտնի դարձավ, սակայն, որ այս վեճը նախապատմություն ունի. որոշ ժամանակ առաջ ֆեյսբուքյան մեկ այլ քննարկման ժամանակ Արսեն Բաբայանը Տիգրան Հակոբյանին «թրքահպատակ» է անվանել: Ենթադրվում է, որ դրա արձագանքն է հնչել:
Նելլի ԳՐԻԳՈՐՅԱՆ
