Այսօր ՀՀ Տավուշի մարզպետ Հայկ Ղալումյանը անցկացրել է աշխատանքային խորհրդակցություն, որին մասնակցել են մարզի համայնքների ղեկավարները եւ մարզպետի աշխատակազմի ստորաբաժանումների ղեկավարները:
Խորհրդակցության ընթացքում քննարկվել են Լեռնային Ղարաբաղից բռնի տեղահանված անձանց Տավուշի մարզում կեցության պայմաններով ապահովելու և աջակցություն ցուցաբերելու հարցեր:
Մարզպետը հանձնարարել է գույքագրել մարզում ազատ բնակարաններն ու տները, որպեսզի քաղաքացիները հյուրանոցներից տեղափոխվեն հիմնական բնակության վայրեր, գույքագրել մարզում թափուր աշխատատեղերը և ըստ մասնագիտության ու կարիքի` բռնի տեղահանվածներին տեղավորել աշխատանքի։
Մարզպետը հանձնարարել է նաեւ կազմակերպել մարզում տեղակայված Արցախից բռնի տեղահանվածների կարիքների բավարարումը, հետևել, որպեսզի երեխաները պարտադիր հաճախեն դպրոց։ Նշենք նաեւ, որ Տավուշի մարզում այս պահին տեղավորվել է 2967 քաղաքացի։
Կարդացեք նաև
Խորհրդակցության ընթացքում քննարկվել են նաեւ քաղաքաշինության, առողջապահության, կրթության և գյուղատնտեսության ոլորտներին առնչվող մի շարք հարցեր: Մանրամասներ են ներկայացվել նաև սուբվենցիոն ծրագրերի ընթացքից:
Խորհրդակցության ավարտին մարզպետը նոր հանձնարարականներ է տվել առաջիկա անելիքների վերաբերյալ:
ՀՀ Տավուշի մարզպետի աշխատասենյակ
