ՌԴ նախագահ Վլադիմիր Պուտինը հայտարարել է, որ ղարաբաղյան իրադարձություններից հետո չի տեսնում այնպիսի պատճառներ, որոնք կարող են խոչընդոտել Ադրբեջանի և Հայաստանի միջև խաղաղության պայմանագրի ստորագրմանը:
«Կարծում եմ, դա լիովին հավանական է, ոչ մի խնդիր ուղղակի չեմ տեսնում Ղարաբաղում իրադարձություններից հետո, որոնք կարող են խանգարել խաղաղության պայմանագրի ստորագրմանը հիմա»,- ասել է Պուտինը Բիշքեկ կատարած այցի արդյունքներով մամուլի ասուլիսի ժամանակ։
Նրա խոսքով՝ Ռուսաստանը պատրաստ է աջակցել խաղաղ բանակցությունների վերսկսմանը և գործընկերներին առաջարկել է հավաքվել Մոսկվայում: Պուտինը նաև նշել է, որ կան տեխնիկական բնույթի հարցեր՝ սահմանագծում, սահմանազատում: «100 մետր այս կողմ, 1 կիլոմետր այն կողմ, արդեն կարևոր չէ, եթե երկու կողմից բարի կամքի դրսևորում լինի, ամեն ինչ հնարավոր է անել»,-հավելել է ՌԴ նախագահը:
Անդրադառնալով Լեռնային Ղարաբաղում ռուս խաղաղապահ զորախմբի գործունեությանը՝ Պուտինը հայտարարել է, որ նրանք փաստացի պետք է այնտեղ մնան մինչև 2025թ., բայց իրավիճակի փոփոխության պատճառով պետք է այս հարցը քննարկել գործընկերների հետ:
Կարդացեք նաև
«Երբ Հայաստանը Ղարաբաղը ճանաչեց Ադրբեջանի մաս, ստացվեց, որ մեր խաղաղապահները արդեն հաստատ, առանց որևէ կասկածի, գտնվում են Ադրբեջանի Հանրապետության տարածքում: Եվ իհարկե այժմ, նամանավանդ, ուղիղ ասենք, ծանր իրադարձություններից հետո՝ կապված հայ բնակչության տարհանման հետ, իրավիճակը կտրուկ փոխվել է»,-ասել է Պուտինը:
