«Ինչքան էլ այդ հարցը բարդ է թվում, այն պարզ է մի պարզ պատճառով` կան քարտեզներ, կան այդ քարտեզների համար իրավական հիմքեր: Ամեն քարտեզ չէ, որ ընդունելի է, որովհետեւ դասագրքերի համար քարտեզն ուրիշ բան է, պետական սահմանների համար քարտեզը բոլորովին ուրիշ բան է՝ իրավական հիմքերով։ Որեւէ տարածք կամ անկլավ կամ այլ կոչվող տարածք նույնպես պետք է որոշակի իրավական հիմք ունենա»,-այս մասին այսօր լրագրողների հետ ճեպազրույցում ասաց տարածքային կառավարման եւ ենթակառուցվածքների նախարար Գնել Սանոսյանն անդրադառնալով Ալիեւի հայտարարությանը, թե Հայաստանում ադրբեջանական ութ գյուղ կա, մինչ այդ անկլավ էր ասում։
Նա նշեց, որ այդ մասին բանակցային գործընթացից տեղյակ պաշտոնյաները խոսել են անկլավներից, ինքը տեղյակ չէ այդ գործընթացից․ «Ենթադրյալ երկու երկրները՝ ճանաչելով միմյանց տարածքային ամբողջականությունը, դրանից հետո պետք է տեղի ունենա սահմանազատում եւ սահմանագծում, որից հետո սահմանները կհստակեցվեն բոլոր առումներով»։
Դիտարկմանը՝ ինչո՞ւ է հիմա 8 անկլավի մասին են խոսում, երբ 1974 թվականի քարտեզով 3 անկլավ է, Սանոսյանը պատասխանեց․ «Պետք է ոչ թե բառերին կամ մտքերին նայել, այլ՝ իրավական փաստաթղթերին։ Անընդհատ անկլավներից խոսելով՝ մեր Արծվաշենը երբեք մի մոռացեք, որն իր չափերով ե՛ւ մեծ է, ե՛ւ իրավական հիմք ունի»:
Մեկ այլ դիտարկմանը՝ օրինակ Տիգրանաշենում եւ Տավուշում ռազմավարական նշանակության ճանապարհներ կան, Սանոսյանը պատասխանեց՝ երբ սահմանագծում եւ սահմանազատում լինի, այդ հարցերն այդ շրջանակում կլուծվեն։
Կարդացեք նաև
Նելլի ԲԱԲԱՅԱՆ
