«Մենք դատապարտել ենք ուժի գործադրումը Ադրբեջանի կողմից։ Ուժի գործադրումը երբեք արդարացված չէ, ինչը մենք տեսանք վերջին օրերին և շաբաթներին»,- ԵԽԽՎ լիագումար նիստի ընթացքում ԵԽԽՎ-ում հայկական պատվիրակության անդամ Վլադիմիր Վարդանյանի հարցին ի պատասխան հայտարարեց Եվրոպական հանձնաժողովի Արդարադատության հանձնակատար Դիդիե Ռեյնդերսը։
Վլադիմիր Վարդանյանը հարցրեց․ «Անցյալ շաբաթ այս դահլիճում ԵՄ խորհրդարանը բանաձեւ ընդունեց, որը դատապարտում էր Ադրբեջանի ռազմական հարձակումը Լեռնային Ղարաբաղի դեմ և կոչ էր անում ԵՄ-ին և նրա անդամ երկրներին թիրախային պատժամիջոցներ ընդունել Ադրբեջանի դեմ: ԵՄ խորհրդարանը նաև կոչ է արել համապարփակ վերանայել ԵՄ-ի հարաբերությունները Ադրբեջանի հետ: Ադրբեջանի նման երկրի հետ գործընկերությունն անհամատեղելի է Եվրամիության արժեքների և նպատակների հետ, այդ թվում՝ արդարադատության և իրավունքի գերակայության ոլորտում։ Պարոն Ռեյնդերս, ի՞նչ եք կարծում, արդյոք Ադրբեջանի գազն ու նավթը բավարա՞ր են, որպեսզի աչք փակեն Ադրբեջանի կողմից միջազգային իրավունքի և իր պարտավորությունների բացահայտ խախտումների և մարդու իրավունքների տագնապալի վիճակի վրա»։
Արդարադատության հանձնակատարն ասաց, որ պետք է առաջնահերթություն տալ դիվանագիտությանը։ Նա հավաստիացրեց, որ ԵՄ-ի կողմից ջանքեր են գործադրվում եվրոպական մակարդակով ապահովել երկխոսություն ՀՀ-ի և Ադրբեջանի միջև, փորձում են երկրների ղեկավարների հանդիպումներ կազմակերպել։ Ըստ Դիդիե Ռեյնդերսի՝ մյուս կարևոր հարցը ԼՂ-ից տեղահանված հայերի իրավունքների պաշտպանությունն է․ «Պետք է կոնկրետ գնահատական տրվի իրավիճակին ՀՀ-ում, Ադրբեջանում և հատկապես ԼՂ-ում և գնահատվեն ԼՂ-ի հայերի կարիքները, ապահովվի նրանց իրավունքները, ապահովվի նրանց անվտանգությունը Ղարաբաղի տարածքում ապրելու համար։ Լեռնային Ղարաբաղի տարածքում մնալը նրանց իրավունքն է»։
Տաթև ՀԱՐՈՒԹՅՈՒՆՅԱՆ
