Որևէ ուսումնական հաստատության վերաբերյալ առանձին քննարկում չի գնացել, մեզ համար առաջնահերթ է ուսանողների կրթության իրավունքի վերականգնումը, որոնք ընդհատել են իրենց կրթությունը՝ Արցախից բռնի տեղահանման պատճառով։ Այս մասին այսօր լրագրողների հետ զրույցում ասաց ԿԳՄՍ նախարար Ժաննա Անդրեասյանը՝ պատասխանելով այն հարցին՝ արդյոք քննարկումներ եղել են Արցախի պետական համալսարանի հետագա հնարավոր գործունեության վերաբերյալ։
«Այսօր էլ կառավարության նիստում կայացվեց որոշում, որով ուսանողներին հատկացնելու ենք կրթաթոշակ և բոլոր ուսանողները՝ բուհերի, քոլեջների, ուսումնարանների, հնարավորություն են ունենալու շարունակել իրենց կրթությունը։ Արդեն ավելի քան 500 ուսանող դիմել է մեր բուհեր, մի քանի հարյուր ուսանող էլ դիմել է քոլեջների, ուսումնարանների հարցով։ Նրանք բոլորը առաջիկա օրերին կընդգրկվեն մեր հաստատություններում։ Վստահ եմ բոլորի կրթությունը կարճ ժամանակում կկարողանանք ապահովել»,- ասաց նա։
Լուսինե ՄԱՐԳԱՐՅԱՆ
