ՀՀ էկոնոմիկայի նախարարի տեղակալ Ռաֆայել Գևորգյանի գլխավորությամբ և Հայաստանի ներդրումային խորհրդի համակարգմամբ` հոկտեմբերի 11-ին կայացավ ՓՄՁ ենթախորհրդի հերթական նիստը։
Օրակարգային հարցերի թվում էին.
- կրթական ծրագրերի իրականացման համար սահմանված որոշ տեխնիկական պահանջների վերանայումը՝ այդ թվում Լեռնային Ղարաբաղից բռնի տեղահանված անձանց մասնագիտական կրթության և վերապատրաստման հնարավորությունների ընդլայնման տեսանկյունից:
Նախագծով առաջարկվում է միջին մասնագիտական ուսումնական հաստատությունների համար վերանայել աշխատողների 60%-ի հիմնական աշխատավայր հանդիսանալու պայմանը, մագիստրոսի կրթական ծրագիր իրականացնող ուսումնական հաստատության պրոֆեսորադասախոսական կազմի դասախոսների գիտական աստիճան ունենալու նվազագույն սահմանաչափը 60%-ից իջեցնել 20%-ի, օտար լեզուներով ուսուցում կազմակերպող ոչ պետական ուսումնական հաստատությունների համար վերացնել դասախոսների՝ օտար լեզվի իմացության հավաստման և վերապատրաստման պահանջները և այլն:
- աշխատանքային պայմանագրերի կնքման թվային հարթակի ներդրման նախաձեռնությունը,
ՀՀ ՊԵԿ-ի կողմից առաջարկված նախագիծը հնարավորություն է տալու ՀՀ ՊԵԿ առողջապահության և աշխատանքի տեսչական մարմնին ցանկացած պահի հասանելի դարձնել կնքված աշխատանքային պայմանագրերը՝ օրենսդրությամբ իրենց վերապահված լիազորությունների շրջանակում։ Նախագծի վերաբերյալ առկա են մի շարք մտահոգություններ` թե իրավական, և թե տնտեսավարողների վրա լրացուցիչ վարչական բեռի առաջացման տեսանկյունից, ինչի մասին բարձրաձայնեցին ՓՄՁ Խորհրդի անդամներն ու Ներդրումային Խորհրդի փորձագետները:
Կարդացեք նաև
- ՀՀ–ում ազատ տնտեսական գոտիների գործունեությանն առնչվող խնդիրներ
Ներկայումս ազատ տնտեսական գոտու շահագործողի թույլտվությունը տրամադրվում է կառավարության որոշմամբ, ինչը վարչարարության տեսանկյունից ծախսատար գործընթաց է և չի համապատասխանում միջազգային լավագույն փորձին։ Առաջարկվում է ազատ տնտեսական գոտու շահագործողի թույլտվություն տրամադրելու իրավասությունը փոխանցել այդ գոտու կազմակերպչին։
Յուրաքանչյուր քննարկված փաթեթի վերաբերյալ հետագա զարգացումների և թարմացումների մասին նորությունները կհրապարակվեն Հայաստանի ներդրումային խորհրդի կայքում։
ՀՀ էկոնոմիկայի նախարարություն
