Սեպտեմբերի 22-ին ձերբակալված եւ կալանքի տակ գտնվող Լեւոն Քոչարյանի եւ երկու՝ գործով տուժող ճանաչված, կարմիրբերետավորների միջեւ երեկ առերես հարցաքննություններ են տեղի ունեցել. այսօր կայացած ասուլիսում այս մասին տեղեկացրեց Լեւոն Քոչարյանի պաշտպանական խմբի անդամ Էրիկ Ալեքսանյանը:
Էրիկ Ալեքսանյան
Առերես հարցաքննությունը պաշտպանն ուշացած է համարում: Նաեւ ուշադրություն է հրավիրում այն հանգամանքին, որ գործով վկայի կարգավիճակ ունեցող կարմիրբերետավորների հետ առերես հարցաքննություն չի եղել: Պաշտպանը ենթադրում է, որ նրանք «պահվել» են քննիչի գործիքակազմում՝ հետագա գործողությունները հիմնավորելու համար: Մասնավորաբար, մի քանի օրից լրանում է Լեւոն Քոչարյանի կալանքի ժամկետը, ենթադրվում է, որ վարույթ իրականացնող մարմինը կալանքի ժամկետը երկարացնելու միջնորդություն է ներկայացնելու, որի հիմքը լինելու են գործով երկու վկաների հետ չկատարված քննչական գործողությունները ու ազատության մեջ լինելու պարագայում՝ Լեւոն Քոչարյանի կողմից վերջիններիս վրա ճնշում գործադրելու հավանականությունը:
Էրիկ Ալեքսանյանը հայտարարում է, որ Լեւոն Քոչարյանին կալանքի տակ պահում են նպատակային, այս պարագայում կալանքը ծառայում է, որպես պատիժ:
Միաժամանակ, պաշտպանը վստահեցնում է, որ երկու տուժողների առերես հարցաքննությունների ժամանակ պատկերը փոխվել է, քան սկզբում էր, երբ նախաքննական մարմնի ընկալմամբ, նրանց ցուցմունքները ընկալվել են «սուպեր-մեղադրականի» բնույթի:
Կարդացեք նաև
Մանրամասները՝ տեսանյութում
Նելլի ԳՐԻԳՈՐՅԱՆ
