«Շալվար հագնող է պետք, որ նշաձողը բարձրացվի»,- այսօր դատական նիստի դահլիճում, դահլիճից դուրս գալու պահին, լրագրողներից մեկի հարցին ի պատասխան ասաց ՀՀԿ փոխնախագահ Արմեն Աշոտյանը:
Լրագրողը հետաքրքրվել էր՝ Արցախի հարցում ե՞րբ Հայաստանն իր նշաձողը կբարձրացնի, շալվարն էլ հետը:
Հիշեցնենք, կալանավայրից, ՀՀ անկախության 32-րդ տարեդարձ շնորհավորելով՝ գրել էր՝ «Շնորհավոր, նշաձողի հետ միասին շալվարդ իջեցրած Հայաստան»:
Դատավոր Վահե Դոլմազյանն, ի դեպ, լրագրողներին դիտողություն արեց՝ հայտարարելով, որ եթե այսուհետ փորձեն դատական նիստերի դահլիճում այլ թեմաներ արծարծել, կհեռացվեն դահլիճից:
Կարդացեք նաև
Մանրամասները՝ տեսանյութում
ՀՀԿ փոխնախագահ Արմեն Աշոտյանի եւ մյուսների գործով այսօր նախնական դատական լսումներն էին:
Հիշեցնենք, Վերաքննիչ հակակոռուպցիոն դատարանի դատավոր Սերգեյ Մարաբյանն օրերս մերժեց ՀՀԿ փոխնախագահ Արմեն Աշոտյանի կալանքի դեմ վերաքննիչ բողոքը եւ Արմեն Աշոտյանին թողեց կալանքի տակ: Պարզվեց, որ Արմեն Աշոտյանի գործն ուղարկվել է դատարան:
Հիշեցնենք նաեւ, որ Արմեն Աշոտյանն արդեն երեք ամիս է՝ կալանավորված է: Նա մեղադրվում է պաշտոնական լիազորությունները չարաշահելու, փողերի վատնման, փողերի լվացման մեջ: Արմեն Աշոտյանին առաջադրված մեղադրանքը, նրա շահերի ներկայացուցիչ Տիգրան Աթանեսյանը որակում է աբսուրդ եւ «հոգեկան խնդիր ունեցող մարդու երեւակայություն»:
Նելլի ԳՐԻԳՈՐՅԱՆ
