Ստրասբուրգում մեկնարկեց Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանը։ Լիագումար նիստի բացման խոսքում ԵԽԽՎ նախագահ Թինի Կոքսը (լուսանկարում), խոսելով անդամ երկրներում տեղի ունեցող ողբերգությունների, համաճարակների, պատերազմների, զինված հակամարտությունների մասին, հիշատակեց նաև Լեռնային Ղարաբաղում կատարվածը՝ օգտագործելով «Ադրբեջանի Ղարաբաղ շրջանի հայեր» արտահայտությունը։ Նա նաև օգտագործեց «exodus» (ելք) եզրույթը՝ ԼՂ բնակչության հետ կատարված ողբերգությունը նկարագրելիս։ Մինչ նստաշրջանի մեկնարկը՝ ԵԽԽՎ պատվիրակները մեկ րոպե լռությամբ հարգեցին բոլոր զոհերի հիշատակը։
Այնուհետև ԵԽԽՎ նախագահը հայտարարեց․ «Ուկրաինայում պատերազմ, պատերազմ Իսրայելում, դրամատիկ զարգացումներ տեսանք նաև Լեռնային Ղարաբաղում։ Մենք չենք կարող աչք փակել այս հազարավոր քաղաքացիների ճակատագրի վրա, որոնք ունեն եվրոպական կոնվենցիաներով պաշտպանություն»։
Թինի Կոքսը նաև հայտնեց, որ ԵԽԽՎ մարդու իրավունքների պաշտպանության հանձնաժողովը որոշում է կայացրել, որ ԵԽԽՎ առաքելությունն այցելի Լեռնային Ղարաբաղ՝ սեփական աչքերով տեսնելու, թե ինչ է կատարվում այնտեղ և արդյոք Հայաստանի եւ Ադրբեջանի քաղաքական ղեկավարություններն ամեն ինչ անո՞ւմ են հումանիտար ճգնաժամը կանխելու համար։
ԵԽԽՎ-ն կողմ քվեարկեց նաև «Հումանիտար իրավիճակը Լեռնային Ղարաբաղում» թեմայով հրատապ ընթացակարգով քննարկում կազմակերպելու՝ ԵԽԽՎ Բյուրոյի առաջարկին։ Լեռնային Ղարաբաղի հարցով կքննարկումը տեղի կունենա հինգշաբթի օրը՝ ԵԽԽՎ լիագումար նիստի ընթացքում։
Կարդացեք նաև
Տաթև ՀԱՐՈՒԹՅՈՒՆՅԱՆ
