«Ֆրանսիան ռազմական տեխնիկա կտրամադրի՞ Հայաստանին, դա մասամբ կախված է Հայաստանի կարիքներից ու Հայաստանի իշխանությունների հայցից, բայց իմ կարծիքով՝ Ֆրանսիան այսօր Հայաստանին մասսայական ռազմական օգնություն տրամադրելու տրամադրություն չունի»,- այս մասին «Առավոտի» հետ զրույցում ասաց ֆրանսահայ հասարակական գործիչ Հիլդա Չոբոյանը՝ անդրադառնալով Ֆրանսիայի արտաքին գործերի նախարարի հայտարարությանը։
Հիշեցնենք, որ Ֆրանսիայի ԱԳ նախարար Կատրին Կոլոննան հայտարարել էր․ «Ֆրանսիան իր համաձայնությունն է տվել ՀՀ-ի հետ ապագայում պայմանագրի կնքման հարցով, որը հնարավորություն կտա ռազմատեխնիկա տրամադրել ՀՀ-ին, որպեսզի ՀՀ-ն կարողանա իր պաշտպանությունը ապահովել»։
Հիլդա Չոբոյանի խոսքով՝ Ֆրանսիայի այս քայլը հանրային ճնշման արդյունք է, Արցախում Ադրբեջանի վերջին հարձակման պայմաններում Ֆրանսիայում հանրային կարծիքը ճնշումներ է գործադրել կառավարության վրա, որ միայն խոսում եք, գործ չկա։ «Անշուշտ, քաղաքական եւ մարդասիրական ոլորտում Ֆրանսիան աջակցություն կցուցաբերի, բայց Հայաստանի ու Արցախի այսօրվա իրադրությունը շատ հզոր լծակների կիրառման կարիք կա։ Իսկապես վտանգ կա, որ Հայաստանի վրա հարձակում կլինի, հետեւաբար այս փոքր քայլերով չէ, որ Ֆրանսիան պետք է կարողանա Ադրբեջանի նոր հարձակման դեմն առնել»,- ասաց նա։
Հիլդա Չոբոյանն ուշադրություն է հրավիրում Գրանադայի հանդիպման եզրափակիչ հայտարարությանը, որով երկու կողմերին՝ Հայաստանին ու Ադրբեջանին կոչ է արվում, որպեսզի ռազմագերիներին ազատ արձակեն։ «Բոլորը գիտեն, որ Հայաստանում ռազմագերիներ չկա։ Երկու կողմերի միջեւ հավասարություն դնելու այս քաղաքականությունը տակավին շարունակվում է։ Ֆրանսիայի խորհրդարանի երկու պալատների տրամադրությունները հետեւյալն են՝ ասում են՝ ինչո՞ւ ենք մենք հսկայական օգնություն տրամադրում Ուկրաինային, բայց Հայաստանին՝ ոչ։ Բայց Ֆրանսիայի կառավարության կեցվածքը շատ դանդաղ է փոխվում, եւ այդ փոփոխություններից վերջինը Կատրին Կոլոննայի հայտարարությունն էր, որ Ֆրանսիան պատրաստ է ռազմական աջակցություն ցուցաբերել Հայաստանին։ Բայց արդյոք Ֆրանսիայի այդ հայտարարությունն անմիջապես շատ որոշիչ քայլերով պետք է իրականանա, թե՞ շաբաթներով, ամիսներով պիտի սպասենք, որ Ֆրանսիան քննի, քննարկի։ Ըստ իս՝ շատ քաջալերող չէ այս ընթացքը»,- հավելեց նա։
Կարդացեք նաև
Հիլդա Չոբոյանի խոսքով՝ անշուշտ, Հայաստանից շատ բան է կախված ստեղծված իրավիճակում, թե Հայաստանը որքանով հնարավոր եւ անհնար լծակները կգործադրի, որպեսզի արագացվի այս գործընթացը։ «Բայց մինչեւ այսօր Ֆրանսիայի քայլերը հույս չեն ներշնչում, որ Հայաստանին լայն օգնություն կտրամադրվի Ֆրանսիայի կողմից»,- հավելեց նա։
Ռոզա ՀՈՎՀԱՆՆԻՍՅԱՆ
