Ադրբեջանը պատրաստ է մոտ ժամանակներս Բրյուսելում նախատեսվող եռակողմ հանդիպումներին՝ Եվրամիություն-Ադրբեջան-Հայաստան ձևաչափով։ Այս մասին «X» սոցիալական ցանցում գրել է Ադրբեջանի նախագահի օգնական Հիքմեթ Հաջիևը։
Նրա խոսքով՝ Ադրբեջանն աջակցում է Բրյուսելյան եռակողմ ձևաչափին, ինչպես նաև տարածաշրջանային խաղաղության օրակարգին՝ ԵՄ, Ադրբեջան և Հայաստան ձևաչափով, որին օժանդակում է Եվրամիության խորհրդի նախագահ Շառլ Միշելը։
Հաջիևը գրել է, որ «Ֆրանսիայի կողմնակալ գործողություններն ու ռազմականացման քաղաքականությունը լրջորեն խաթարում են խաղաղությունն ու կայունությունը Հարավային Կովկասում՝ վտանգի տակ դնելով Եվրամիության ընդհանուր քաղաքականությունը տարածաշրջանի նկատմամբ»։
Անդրադառնալով Գրանադա չմեկնելու Ադրբեջանի նախագահի որոշմանը՝ Հաջիևը որպես պատճառ նշել է հնգակողմ հանդիպմանը Թուրքիայի մասնակցությանը հավանություն չտալու որոշումը։ «Որոշ միջազգային ԶԼՄ-ներ դա ներկայացրեցին որպես Հայաստանի հետ բանակցություններից հրաժարվել։ Ադրբեջանը պատրաստ է առաջիկայում Բրյուսելում կայանալիք եռակողմ հանդիպումներին՝ Եվրամիություն, Ադրբեջան և Հայաստան ձևաչափով։ Միևնույն ժամանակ Ադրբեջանը աջակցում է ուղիղ և երկկողմ երկխոսությանը՝ Ադրբեջանի և Հայաստանի միջև հարաբերությունների կարգավորման գործընթացի և խաղաղության պայմանագրի բանակցությունների շուրջ»,-հավելել է նա։
