Վերին Լարսում հայկական բեռներով ոչ բոլոր բեռնատարներն են անցնում, բայց անցնում են։ Այս մասին այսօր կառավարության նիստից հետո լրագրողների հետ ճեպազրույցում ասաց էկոնոմիկայի նախարար Վահան Քերոբյանը։
«Նախորդ օրը մի քանի տասնյակ մեքենա` ալկոհոլային խմիչքներով բեռնված, արդեն անցել է»,-ասաց նախարարը։
Օրերս Քերոբյանն ասել էր, որ Վերին Լարսի անցակետում հայկական բեռները կանգնած են, ռուսական կողմը ստուգումներ է կատարում կոնյակի որակի հետ կապված։
Արդյոք դա ՌԴ-ի պատասխանն է ՀՀ խորհրդարանում Հռոմի ստատուտի ընդունմանը։ Քերոբյանն այս առնչությամբ ասաց․ «Ես չէի ասի, որ որեւէ քաղաքական ենթատեքստ կա։ Որոշ մեքենաներից նմուշառումներ են արվել, սպասում ենք արդյունքներին։ Այլ մեքենաներն անցնում են, ես չէի ուռճացնի խնդիրը»։
Կարդացեք նաև
Քերոբյանի ներկայացմամբ՝ կառավարության եւ էկոնոմիկայի նախարարության տնտեսական քաղաքականության առաջնահերթություններից է, որ Հայաստանում արտադրող ապրանքները լինեն բարձր որակի․ «Մենք որոշ ժամանակ առաջ սկսել ենք գործընթաց, որպեսզի ՀՀ-ից արտահանվող խմիչքը լինի բարձր որակի»։
Նելլի ԲԱԲԱՅԱՆ
