Դատապարտելով Լեռնային Ղարաբաղի բռնազավթումը Ադրբեջանի կողմից՝ Եվրախորհրդարանի պատգամավորները պահանջում են պատժամիջոցներ սահմանել պատասխանատուների դեմ, իսկ Եվրամիությանը կոչ են անում վերանայել հարաբերությունները Բաքվի հետ։
Համապատասխան բանաձևն ընդունվել է հոկտեմբերի 5-ին, բանաձևին կողմ է քվեարկել 491, դեմ՝9, ձեռնպահ՝ 37 պատգամավոր։ Ընդունված բանաձեւը խստորեն դատապարտում է Ադրբեջանի կողմից Լեռնային Ղարաբաղի հայերի դեմ նախապես ծրագրված և չարդարացված ռազմական հարձակումը, որն իրենից ներկայացնում է միջազգային և մարդու իրավունքների կոպիտ խախտում։
Եվրախորհրդարանականները նաև ընդգծում են, որ Լեռնային Ղարաբաղում ստեղծված ներկայիս իրավիճակը հավասարազոր է էթնիկ զտումների և խստորեն դատապարտում են Լեռնային Ղարաբաղի հայ բնակիչների նկատմամբ ադրբեջանական զորքերի կողմից իրականացված սպառնալիքներն ու բռնությունը:
Նրանք նաև կոչ են անում ԵՄ-ին և անդամ երկրներին անհապաղ ցուցաբերել անհրաժեշտ օգնություն Հայաստանին՝ ստեղծված հումանիտար ճգնաժամին լուծում տալու համար, որն առաջացել է Լեռնային Ղարաբաղից փախստականների հոսքից հետո։
Կարդացեք նաև
Եվրախորհրդարանի պատգամավորները կոչ են անում թիրախային պատժամիջոցներ սահմանել Բաքվի այն պաշտոնյաների դեմ, որոնք պատասխանատու են Լեռնային Ղարաբաղում հրադադարի բազմաթիվ խախտումների և մարդու իրավունքների ոտնահարման համար, ինչպես նաեւ հետաքննել ադրբեջանական ուժերի կողմից իրագործված հնարավոր ռազմական հանցագործությունները։
Եվրախորհրդարանականները, դատապարտելով Ադրբեջանի նախագահի և այլ պաշտոնյաների կողմից Հայաստանի տարածքային ամբողջականությանն ու ինքնիշխանությանը սպառնացող հայտարարությունները, զգուշացնում են Բաքվին զերծ մնալ հնարավոր արկածախնդրությունից, իսկ Թուրքիային կոչ են անում զսպել դաշնակցին։
Բանաձևը Եվրամիությանը կոչ է անում վերանայել հարաբերությունները Բաքվի հետ՝ հաշվի առնելով վերջին զարգացումները, ինչպես նաև Ադրբեջանում մարդու իրավունքների վիճակը։ Պատգամավորները կոչ են անում ԵՄ-ին դադարեցնել Բաքվի հետ նոր գործընկերության վերաբերյալ ցանկացած բանակցություն, և եթե իրավիճակը չբարելավվի, մտածել Ադրբեջանի հետ ԵՄ մուտքի արտոնագրերի դյուրացման համաձայնագրի կիրառման կասեցման մասին:
Խորհրդարանը նաև կոչ է անում ԵՄ-ին նվազեցնել կախվածությունը ադրբեջանական գազի ներկրումից և Հայաստանի դեմ ռազմական ագրեսիայի կամ հիբրիդային հարձակումների դեպքում՝ ամբողջությամբ դադարեցնել ԵՄ-ից ադրբեջանական նավթի և գազի ներմուծումը:
