Իրանից ստացված մոտ 60 տոննա մարդասիրական օգնությունը՝ սնունդ, հիգիենիկ պարագաներ, տաք ծածկոցներ, ջեռուցիչներ կբաշխվեն Սյունիքի մարզում բնակություն հաստատած Արցախից բռնի տեղահանվածներին։ «Սա Իրանի ժողովրդի զորակցությունն է հայ ժողովրդին, մենք ի սկզբանե պատրաստվում էին մարդասիրական բեռներ ուղարկելու Արցախի ժողովրդին, բայց չստացվեց։ Ադրբեջանի պաշտոնյաների հետ հանդիպմանը հումանիտար աջակցության տրամադրման մասին նաեւ մեր գերագույն գլխավոր առաջնորդն ու նախագահն են այդ մասին խոսել, նաեւ պնդել՝ Ղարաբաղի ժողովրդի իրավունքներն ու անվտանգությունը պիտի պահպանվեն»,-լրագրողների հետ ճեպազրույցում ասաց Հայաստանում Իրանի Իսլամական Հանրապետության նորանշանակ արտակարգ եւ լիազոր դեսպան Մեհդի Սոբհանին՝ նշելով, որ Հայաստանը Իրանի լավ բարեկամն է, ու հարեւանը, իսկ Իրանը կանգնած է Հայաստանի կառավարության ու հայ ժողովրդի կողքին։
Դեսպանի խոսքով՝ սա դեռ սկիզբն է, բռնի տեղահանվածների կարիքները գնահատելուց հետո էլի աջակցություն կլինի։
Դեսպան Սոբհանին նշեց, որ շատ կուզենար առաջին անգամ Սյունիք գար ու մարզային իշխանություններին հանդիպել այնպիսի իրավիճակում, որը չհամընկներ այսօրվա իրավիճակին։ Այս իրավիճակը, նրա խոսքով՝ իրենց համար էլ է ցավալի․ «Խոսքը քաղաքական հարցերի մասին չէ, այլ՝ մարդասիրական բնույթի»,-փաստեց Մեհդի Սոբհանին։
Կարդացեք նաև
Մեհդի Սոբհանին անդրադառնալով Թուրքիայի նախագահի այն հայտարարությանը, թե Իրանը պատրաստ է միջանցք տրամադրել Ադրբեջանին, ասաց․ «Մենք ցանկացած բանի, որի անունը միջանցք է՝ դեմ ենք, ու որը չի լինի ՀՀ ինքնիշխանության ներքո։ Իսկ եթե խոսքը վերաբերում է հաղորդակցությանը, ապա ներկա պահին էլ կա։ Թուրքիայի եւ Ադրբեջանի բեռնատարները գալիս-գնում են։ Նրանք, ովքեր մտածում են՝ որ կարող են իրենց անորոշ հայտարարություններով ինչ-ինչ հնարավորություններ ստեղծել՝ չարաչար սխալվում են»։
Արմեն ԴԱՎԹՅԱՆ
