Լիբանանցի իրավապաշտպան Լին Զովիղյանը բաց նամակ է հրապարակել՝ անդրադառնալով վերջին երեք տասնամյակում առաջին անգամ ՄԱԿ առաքելության այցին Լեռնային Ղարաբաղ, կառույցի կողմնակալ արձագանքին, ինչպես նաև ստեղծված ծանր իրավիճակին։
Նշվում է, որ Լեռնային Ղարաբաղի հայերը, որոնք 9 ամիս ապրել են շրջափակման, սովի պայմաններում, իսկ հետո բռնի տեղահանման են ենթարկվել Ադրբեջանի կողմից սեպտեմբերի 19-ին Լեռնային Ղարաբաղի վրա հարձակումից հետո, վրդովված են առաքելության հրապարակած հայտարարությունից։ Իրավապաշտպանն ընդգծում է, որ ՄԱԿ-ը, ըստ իր կանոնադրության, պարտավոր է պաշտպանել մարդու իրավունքներն ու արժանապատվությունը, մասնավորապես նրանց իրավունքները, որոնք կարիքի մեջ են գտնվում։
Զովիղյանը ցավով արձանագրում է, որ պատմական առաքելության հայտարարությունը ներկայացնում է ՄԱԿ-ը՝ որպես անտարբեր կառույց մարդասիրական արտակարգ իրավիճակի հանդեպ, որը միայն պասիվ կերպով է անդրադառնում այն տառապանքին, որը կրել է և շարունակում է կրել Լեռնային Ղարաբաղի հայ բնակչությունը, որը բախվել է անտարբերության, ենթարկվել բռնության և տեղահանման։
«Ըստ էության այս առաքելությունը արջի ծառայություն մատուցեց Ադրբեջանին, որի կառավարությունը շարունակում է պայքարել միջազգային հարթակներում բարեխիղճ և վստահելի գործընկերոջ համբավը վերադարձնելու համար։ Ուշագրավ է, որ Լեռնային Ղարաբաղ ՄԱԿ առաքելության այցից առաջ Ադրբեջանը հայտարարեց կազմակերպության Մարդկային բնակավայրերի ծրագրին 1 միլիոն դոլար հատկացնելու մասին»։
Կարդացեք նաև
Զովիղյանի խոսքով՝ այժմ ամենահրատապ հարցերից մեկը ԼՂ-ում միջազգային անկախ փաստահավաք խմբի առաքելության աշխատանքի կազմակերպումն է, քանի որ ժամանակը որոշիչ նշանակություն ունի, բացի այդ` կա ապացույցները ոչնչացնելու կամ խեղաթյուրելու վտանգ։ «Փաստացի, հնարավոր հանցագործությունների բոլոր վկաները բռնի տեղահանման են ենթարկվել։ Արցախում չի մնացել որևէ մեկը, որը աշխարհին կպատմեր պատմությունը ջնջելու և վերաշարադրելու մասին․․․ Մենք բոլորս ընդհանուր պատասխանատվություն ունենք բարձրացնելու մեր չափանիշները և ընդունել, հարգել այն բարդությունները, ապատեղեկատվության և անմարդկայնության ռիսկերը, որոնց բախվում է մի ողջ ժողովուրդ և նրանց պատմական հողը»,-ասվում է նամակում։
