ԱԺ ճեպազրույցների ժամանակ «Քաղաքացիական պայմանագիր» խմբակցության պատգամավոր Արման Եղոյանն անդրադարձավ Գրանադայի հանդիպման չեղարկմանը։
«Ես ուզում եմ հիշեցնել, որ Գրանադայի հանդիպումից առաջ մի շարք ընդդիմադիր գործիչներ, լրագրողներ հայտարարում էին, որ այդ հանդիպման ժամանակ Հայաստանը պետք է ստորագրի Հայաստանի համար շատ անբարենպաստ եւ Ադրբեջանի համար շատ բարենպաստ մի փաստաթուղթ։ Եվ ի՞նչ ցույց տվեց կյանքը, որ այդ հանդիպումից հրաժարվեց Ադրբեջանը։ Պարզ է, որ Ադրբեջանը չէր հրաժարվի մի հանդիպումից, որտեղ իր համար շատ բարենպաստ փաստաթուղթ պետք է ստորագրվեր»,- ասաց նա։
Հարցին, թե արդյոք հայկական կողմը չպե՞տք է բանակցություններին մասնակցելու համար նախապայման դնի հայ ռազմագերիներին եւ վերջին օրերին առեւանգված Արցախի գործիչներին ազատ արձակելու հարցը, Արման Եղոյանը պատասխանեց․ «Դուք առաջարկում եք բանակցություններից դո՞ւրս գալ»։ Նա ասաց, որ այդ հարցերը պետք է բարձրացվեն բանակցությունների ժամանակ։
«Բա բանակցությունները հենց նրա համար են, որ բոլոր հարցերը քննարկվեն։ Մի շարք ռազմագերիներ հետ են վերադարձել, մեկ այլ խումբ ռազմագերիներ դեռ Բաքվում են։ 2020 թվականի պատերազմից հետո քանի՞ ռազմագերի է վերադարձել Հայաստան, թիվը գիտե՞ք։ Նրանք ովքեր վերադարձել են Հայաստան, դա տեղի է ունեցել բանակցությունների շնորհիվ։ Ամեն հերթական բանակցային ռաունդից հետո որոշակի թվով ռազմագերիներ էին վերադառնում, դուք ի՞նչ էիք առաջարկում՝ այդ բանակցություններին չմասնակցել ու ուլտիմատում դնե՞լ։ Եվ ի՞նչ կլիներ դրա արդյունքը»,- ասաց նա։
Կարդացեք նաև
Ռոզա ՀՈՎՀԱՆՆԻՍՅԱՆ
