ԵՄ արտաքին գործերի և անվտանգության քաղաքականության բարձր ներկայացուցիչ Ժոզեպ Բորելը հայտարարություն է տարածել՝ ողջունելով Հայաստանի Հանրապետության իշխանությունների կողմից Միջազգային քրեական դատարանի Հռոմի ստատուտի վավերացումը։
«Եվրամիությունը ողջունում է հոկտեմբերի 3–ին ՀՀ Ազգային ժողովի կողմից միջազգային քրեական դատարանի Հռոմի ստատուտի վավերացումը։ Հայաստանի նախագահի ստորագրությունից հետո որոշումն ուժի մեջ կմտնի»,– ասված է Բորելի հայտարարության մեջ։
Եվրամիությունը կոչ է արել բոլոր այն պետություններին, որոնք դեռ չեն վավերացրել Հռոմի ստատուտը, անել դա։ Նշվում է, որ յուրաքանչյուր երկրի միացումը Հռոմի ստատուտին ավելի է մոտեցնում միջազգային հանրության համընդհանուր մասնակցությանը և ամրապնդում է անպատժելիությանը վերջ դնելու և հաշվետու լինելու մշակույթը զարգացնելու ընդհանուր վճռականությունը:
Ըստ հայտարարության՝ ԵՄ-ն կշարունակի աշխատել Միջազգային գործընկերների հետ և նպաստել Հռոմի ստատուտի վավերացմանն ու իրականացմանը, ինչպես նաեւ ՄՔԴ-ի ամբողջականությանը։
