«Ես խոսում եմ լուրջ ոճրագործության մասին։ Ես չեմ ցանկանում ոճրագործության իրավական որակումը տալ, բայց ասում եմ, որ դրանք ոճիրներ են։ Ասացի, որ սպառնալիքի տակ են տեղի ունեցել այդ տեղահանումները։ ՀՀ-ն միանում է միջազգային քրեական դատարանին, որն իրավասու է մի շարք ոճիրներ քննել»,-ֆրանսիացի լրագրողը փաստեց՝ Դուք Ձեր խոսքում չեք օգտագործում էթնիկ զտում արտահայտությունը՝ անդրադառնալով ԼՂ-ից տեղահանված հայերի խնդիրներին, մինչդեռ հայկական կողմը դա է օգտագործում, իսկ դուք օգտագործում եք բռնի տեղահանում արտահայտությունը և հարցրեց՝ դա գիտակցվա՞ծ ընտրություն է, Երևանում կայացած ՀՀ ԱԳ նախարար Արարատ Միրզոյանի հետ համատեղ մամուլի ասուլիսի ժամանակ այսպես պատասխանեց Ֆրանսիայի Հանրապետության Եվրոպայի և արտաքին գործերի նախարար Կատրին Կոլոննան:
Նշենք, որ մինչ ասուլիսը Ֆրանսիայի արտգործնախարար Կատրին Կոլոննան ՀՀ առողջապահության նախարար Անահիտ Ավանեսյանի ուղեկցությամբ այցելել է Այրվածքաբանության ազգային կենտրոն, տեսակցել Լեռնային Ղարաբաղում պայթյունից տուժածներին, կենտրոնին փոխանցել Ֆրանսիայի հումանիտար օգնությունը:
Հայ լրագրողների դիտարկմանը՝ ՀՀ-ում կարծիքներ կան, որ Ֆրանսիան ակտիվ չի եղել՝ կանգնելով ԼՂ-ի կողքին, ինչպես նաև մեկնաբանություններ կան, որ Արևմուտքը ինչպես միշտ ուշացած արձագանքեց, ՄԱԿ-ի ԱԽ-ն անգամ բանաձև չընդունեց, չպաշտպանեց ԼՂ հայերի իրավունքները, որոնք իրենց հողում էին ապրում, Ֆրանսիայի ԱԳ նախարարն արձագանքեց․ «Ֆրանսիան եղել ու մնում է Հայաստանի հուսալի բարեկամը և մնալու է այդպիսին։ Թվարկել եմ այն ամենը, ինչ մենք արել ենք։ Մտահոգված ենք եղել, փորձել շատերին հավաքել այն սկզբունքների, արժեքների շուրջ, որ մենք դավանում ենք, բայց չենք կարողացել բավարար ուժեր հավաքել մեր շուրջը»։
Խոսելով ՄԱԿ-ի ԱԽ-ի նիստից քաղված դասերի մասին՝ Ֆրանսիայի ԱԳ նախարարն ասաց․ «Դասեր պետք է քաղենք՝ հեռանկարում ունենալով գուցե հնարավոր բանաձև։ Զգույշ եմ արտահայտվում՝ բառերս ընտրելով, ջանում ենք պայմաններ ստեղծել, որ հնարավոր լինի բանաձև ընդունել, և շարունակում ենք այդ ուղղությամբ աշխատել։ Այդ առումով մեր տեսլականը նույնն է, որ կարողանանք փորձել մեր տեսլականին միավորել ՄԱԿ-ի ԱԽ-ի այլ անդամների»։
Կարդացեք նաև
Տաթև ՀԱՐՈՒԹՅՈՒՆՅԱՆ
