Հայաստանը, ինչպես ցանկացած երկիր, որը վավերացնում է Միջազգային քրեական դատարանի Հռոմի ստատուտը, կորցնում է իրավական ինքնիշխանությունը, ինչը նվաստացուցիչ է, գրել է ՌԴ Դաշնային խորհրդի փոխխոսնակ Կոնստանտին Կոսաչևը Telegram-ի իր ալիքում։
Նա նշել է, որ ՀՀ ԱԺ-ի կողմից Հռոմի ստատուտի վավերացումը ակնհայտ ոչ բարեկամական վերաբերմունք է Ռուսաստանի հանդեպ։ «Հայաստանի խորհրդարանում չգտնվեցին ուժեր, որոնք կկարողանային կանգնեցնել «Հաագայի ֆեմիդա»-ի կողմից այս երկրի իրավական «հնազանդման» գործընթացը»,-գրել է պատգամավորը։
Կոսաչևի խոսքով՝ միամտություն է հավատալ, որ այս կերպ Հայաստանը կկարողանա լուծել Ադրբեջանի հետ հակամարտության գոտում ենթադրյալ ռազմական հանցագործությունների հետաքննության հետ կապված հարցերը։ «ՄՔԴ նախադեպային իրավունքը բազմիցս ապացուցել է հակառակը, այն է՝ միջամտություն անդամ պետությունների ներքին գործերին: Ի վերջո, ապագայում վավերացման այսօրվա որոշումը կարող է շրջվել հենց Հայաստանի իշխանությունների դեմ»,- հավելել է պատգամավորը:
