Ցանկացած միջազգային պայմանագիր խորհրդարանում ընդունվելուց հետո ուղարկվում է ՀՀ նախագահին, որը այդ որոշման հիման վրա պատրաստում է վավերագիր: Այն պահից, երբ այդ փաստաթուղթը հանձնվում է միջազգային պայմանագրերի ավանդապահին, դրանից հետո 60 օր անց այն մտնում է ուժի մեջ: Այսօր ԱԺ-ում լրագրողների հետ զրույցում ԱԺ պետաիրավական հարցերի հանձնաժողովի նախագահ Վլադիմիր Վարդանյանն այսպես բացատրեց ընթացակարգը՝ Հռոմի ստատուտը վավերացնելու հետ կապված:
Հարցին՝ դուք արցախահայերի, ՀՀ անվտանգությամբ եք բացատրում ստատուտը վավերացնելու անհրաժեշտությունը, բայց ցույց տվեք միջազգային որեւէ կառույցի որեւէ որոշում, որեւէ փաստաթուղթ, որն Ադրբեջանն այս ընթացքում հաշվի է առել, ի՞նչ երաշխիքով եք դուք միանում սրան, երբ որ մարտահրավեր կա նաեւ ՌԴ-ից՝ Վլադիմիր Վարդանյանը պատասխանեց. «Այն, որ բազում հանցագործներ դեռեւս գտնվում են ազատության մեջ, դա դեռեւս հիմք չի վիճարկելու կամ անվավեր ճանաչելու քրեական օրենսգիրքը»:
Վլադիմիր Վարդանյանն ասաց, որ որեւէ խնդիր չեն տեսնում այս փաստաթուղթը վավերացնելու հետ կապված. «Մենք նախկինում որեւէ փաստաթուղթ չունեինք, որում ընդհանրապես անդրադարձ է կատարվել Ադրբեջանի հանցավոր գործողություններին: Ստատուտը պետք է վավերացվեր 20 տարի առաջ, Գուրգեն Մարգարյանի դեպքը պետք է լիներ այն դեպքը, որը պետք է փոխանցվեր Միջազգայի քրեական դատարան»:
Հարցին՝ միջազգային հանրությունը պատժամիջոցներ չկիրառեց Ադրբեջանի նկատմամբ, հիմա ո՞րն է երաշխիքը, որ կպատժվեն Ադրբեջանի հանցավոր գործողությունները՝ Վլադիմիր Վարդանյանը պատասխանեց, որ պետք է պայքարել այնքան ժամանակ, քանի դեռ շարունակում է հանցավոր մնալ եւ այն հանգամանքը, որ այս կամ այն միջազգային կազմակերպությունը դեռեւս չի արձագանքել, չի նշանակում, որ իրավախախտում չկա. «Ստատուտն ընդունվում է հանցավորության զոհ դարձած բոլոր անձանց իրավունքների պաշտպանության համար, ընդունում է հավանական հանցագործներին կամ իրենց պետության տարածքում, կա՛մ միջազգային քրեական դատարանի կողմից պատասխանատվության ենթարկելու հնարավորությունները նախատեսելու համար»:
Կարդացեք նաև
ՌԴ-ից նշում են, որ առաջարկներ են ուղարկել ՀՀ-ին, հաշվի չեն առնվել՝ Վլադիմիր Վարդանյանը պատասխանեց, որ առաջարկները չգիտի, բայց Հռոմի ստատուտի վավերացումը չէր կարող որեւէ եղանակով չտեղավորվել մեր արտաքին քաղաքականության օրակարգում. «Ինչ վերաբերվում է ՌԴ նախագահի այցին ՀՀ, երբեք միջազգային քրեական դատարանի պրակտիկայում չի եղել, որ երկրի գործող նախագահ փոխանցվի միջազգային քրեական դատարանին: Ես անձամբ համարում եմ, որ ՄԱԿ-ի ԱԽ մշտական անդամ երկրի նկատմամբ նման ակտեր կայացնելը կարող է խոչընդոտել դատարանի հետագա կայացմանը: Անկախ ամեն ինչից՝ ստատուտը կվավերացվեր, թե չէր վավերացվի, ՀՀ-ի եւ ՌԴ-ի հարաբերություններն այնպիսին էին, որ ստատուտի 98-րդ հոդվածի երկրորդ մասի հիման վրա համաձայնագրերի առկայությունը մշտապես օգտակար կլիներ երկկողմ հարաբերությունների զարգացման համար»:
Հարցին՝ ծանր հետեւանքներ սա չի՞ ունենա՝ Վլադիմիր Վարդանյանը պատասխանեց, որ ՄԱԿ-ի հովանու ներքո ընդունված որեւէ փաստաթղթի վավերացումը չի կարող դիտարկվել որպես ակտ, որը կարող է վատթարացնել որեւէ երկկողմ հարաբերություն:
Մանրամասները՝ տեսանյութում:
Հռիփսիմե ՋԵԲԵՋՅԱՆ
