«Էլի փորձ է արվում այս դահլիճից սուտը սփռել ամբողջ Հայաստանի Հանրապետության տարածքով։ Այս կանոնադրությունը ոչ մի կապ չունի Հայաստանի տարածքային ամբողջականության հետ, Հայաստանի ինքնիշխանության հետ, ոչ մի կապ չունի արցախահայերի իրավունքների հետ»,- ԱԺ նիստում Հռոմի ստատուտի վավերացման քվեարկության ժամանակ ասաց «Պատիվ ունեմ» խմբակցության պատգամավոր Աննա Մկրտչյանը։
Ազգային ժողովն առաջին ընթերցմամբ ընդունեց 1998 թվականի հուլիսի 17-ին ստորագրված` Միջազգային քրեական դատարանի Հռոմի կանոնադրությունը վավերացնելու եւ կանոնադրության 12-րդ հոդվածի 3-րդ մասի համաձայն՝ Միջազգային քրեական դատարանի իրավազորությունը հետադարձորեն ճանաչելու մասին հայտարարություն ընդունելու մասին նախագիծը։ Կողմ քվեարկեց 60, դեմ՝ 22 պատգամավոր։
«Ինչպես արդեն իսկ բազմաթիվ միջազգային ատյաններում ինչ-որ որոշումներ են կայացվել, անգամ միջազգային դատարաններում եւ մնացել են անկատար ու վերացարկված, նույն տրամաբանության մեջ մնալու է նաեւ այս կանոնադրությունը։ Իսկ Հայաստանի Հանրապետության ինքնիշխանությունը, տարածքային ամբողջականությունը եւ արցախահայերի իրավունքները ծախված են։ Եվ ծախողն էլ Նիկոլն է, Հռոմի ստատուտը դրա հետ կապ չունի ընդհանրապես»,- հայտարարեց Աննա Մկրտչյանը։
ԱԺ նախագահ Ալեն Սիմոնյանն արձագանքեց․ «Հաշվի առնելով, որ քննարկում է եղել, եւ դուք չեք մասնակցել այդ քվեարկությանը, ես թույլ չեմ տա հիմա քվեարկությունը վերածել քննարկման։ Բարի լինեիք գայիք, ելույթ ունենայիք, հարց տայիք, խոսեիք հակասահմանադրական լինելու մասին, իսկ հիմա քննարկել արդեն իսկ քվեարկված նախագիծը ինձ համար անընդունելի է»։
Կարդացեք նաև
Ռոզա ՀՈՎՀԱՆՆԻՍՅԱՆ
