Հռոմի ստատուտի վավերացման հետ կապված Մոսկվայից կոշտ արձագանքում են ու դիտարկում դա որպես թշնամական քայլ: Այս առնչությամբ այսօր ՔՊ խմբակցության պատգամավոր Էդուարդ Աղաջանյանը լրագրողների հետ ճեպազրույցում հարցին՝ ռուսներն ի՞նչ կարող են անել, ի՞նչ ռիսկեր եք դուք տեսնում՝ պատասխանեց. «ՀՀ իշխանության տարբեր ներկայացուցիչներ բազմիցս դիրքորոշում են ներկայացրել ստատուտի վերաբերյալ, այն դրական կողմերը, որ դրա ընդունմանը կհետեւի Հայաստանի անվտանգային միջավայրի ձեւավորումը, սա որեւէ առնչություն չունի ՌԴ-ի հետ մեր հարաբերությունների վրա: Սա փոխանցել ենք մեր ռուս գործընկերներին: Այն արձագանքները, որոնցից դուք խոսում ենք, մենք դրանց ծանոթ ենք, դրանից մեր դիրքորոշումը չի փոխվում: ՀՀ-ն սուվերեն պետություն է եւ պետք է առաջնորդվենք բացառապես ՀՀ պետական շահերով»:
Ինչ վերաբերում է ՌԴ-ի կողմից պատժամիջոցներին՝ նա ասաց. «ՀՀ ղեկավարությունը հնարավոր սցենարների պարագայում համապատասխան քայլեր կձեռնարկի»:
Հարցին՝ որ գազը թանկացավ, ի՞նչ պետք է անի ՀՀ ղեկավարությունը՝ Աղաջանյանը պատասխանեց, թե որեւէ հիմնավոր պատճառ պնդելու, որ նման քայլեր կլինեն՝ չկա:
Հռիփսիմե ՋԵԲԵՋՅԱՆ
