«Ընդդիմության ջղաձգումներին պետք է վերաբերվել հասկանալիորեն։ Երեք տարի խոսել դավաճանությունից, երեք տարի խոսել կապիտուլյացիայից, հողատվությունից, ազգադավությունից, բայց հետո գնալ ազգադավությամբ զբաղվել, դավաճանությամբ ու հողատվությամբ զբաղվել եւ ստորագրել թուղթ, որով Լեռնային Ղարաբաղի Հանրապետությունը չկա: Դա այնպիսի բան է, որը Բաթումի պայմանագրի, Ալեքսանդրապոլի պայմանագրի նման մնալու է հայոց պատմության էջերում եւ որպես խարան ձեր դեմքին»,- ԱԺ նիստում հայտարարեց ՔՊ խմբակցության պատգամավոր Գեւորգ Պապոյանը՝ արձագանքելով «Հայաստան» խմբակցության պատգամավոր Արծվիկ Մինասյանի ելույթին։
Բանավեճ տեղի ունեցավ ընդդիմադիր եւ իշխանական պատգամավորների միջեւ։ ԱԺ նախագահ Ալեն Սիմոնյանը դիմեց «Հայաստան» խմբակցության պատգամավոր Սեյրան Օհանյանին․ «Պարոն Օհանյան, զսպեք ձեր գնահատականները, որովհետեւ նմանատիպ գնահատականներ կարող են բոլոր տեղերից հնչել»։
Գեւորգ Պապոյանը շարունակեց․ «Երեք տարի շարունակ ինչ ասես արեցիք, որ դռներն ասես չգնացիք, որպեսզի Հայաստանում կարողանաք զավթել իշխանությունը։ Չստացվեց Հայաստանում զավթել իշխանությունը, բայց հաջողվեց զավթել իշխանություն Լեռնային Ղարաբաղում։ Եվ ի՞նչ տեղի ունեցավ, նախ զավթեցին իշխանությունն Ազգային ժողովում, դաշնակցական ԱԺ նախագահ ընտրեցին, հետո անցան զավթման երկրորդ փուլին, իրենց ուզած նախագահին ընտրեցին։ Մի հրճվանք այստեղից, երկու խմբակցությունների ղեկավարները հայտարարություններ են տարածում, հայտարարություններ, շնորհավորանքներ։ Տեսանք՝ ինչ եղավ, մեկ շաբաթ հետո կապիտուլյացիան ստորագրեցիք։ Այ, կապիտուլյացիան դա էր, 2020 թվականի նոյեմբերին Հայաստանը կապիտուլյացիա չի ստորագրել, 2020 թվականի նոյեմբերին Հայաստանը պատերազմի դադարեցման մասին թուղթ է ստորագրել՝ Հայաստանի համար վատ պայմաններով։ Կապիտուլյացիան դուք եք ստորագրել, հետեւաբար, այո, կապիտուլյանտն էլ եք դուք, հողատուն էլ եք դուք, դավաճանն էլ եք դուք»։
Կարդացեք նաև
Ռոզա ՀՈՎՀԱՆՆԻՍՅԱՆ
