Լոռու մարզպետ Արամ Խաչատրյանի գլխավորությամբ այսօր խորհրդակցություն էր հրավիրվել Լոռու մարզպետի աշխատակազմի պատասխանատու պաշտոնյաների, մարզի խոշորացված համայնքների ղեկավարների և տարածքային ՄՍԾ-ների տնօրենների մասնակցությամբ: Լեռնային Ղարաբաղից բռնի տեղահանված և մարզի տարբեր բնակավայրերում ապաստանել ցանկացող մեր հայրենակիցներին կեցավայրով ապահովելու և սոցիալական, առողջապահական, կրթական և մի շարք այլ հարցերի կազմակերպման աշխատանքները օպերատիվ և բարձր մակարդակով իրականացնելուն էին ուղղված խորհրդակցության օրակարգային հարցերը:
Նշվեց, որ կեսօրի դրությամբ մարզպետարանը մարզի խոշորացված համայնքների հետ համագործակցությամբ ընդունել է շուրջ հազար բռնի տեղահանված քաղաքացի, ովքեր ապահովվել են կեցավայրով: Մարդկանց հոսքը պարբերաբար աճում է:
Մարզի ղեկավարը հայտնեց, որ այս նպատակով մարզպետի աշխատակազմում ստեղծված համակարգող խումբը և համայնքներում ձևավորված արագ արձագանքման խմբերն աշխատում են շուրջօրյա ռեժիմով՝ առանձնակի շնորհակալություն հայտնելով նրանց անշահախնդիր աշխատանքի համար:
Ա. Խաչատրյանը ևս մեկ անգամ շեշտեց, որ պետբյուջեից մարզպետարանին հատկացված միջոցներից կփոխհատուցվեն հյուրանոց-հյուրատների ծախսերը, վարձակալությամբ տրամադրված բնակարանների վարձերը և այլն:
Կարդացեք նաև
Լուծում կստանան նաև դպրոցականների կրթության ապահովման, նախադպրոցական տարիքի երեխաների՝ մանկապարտեզներ հաճախելու խնդիրները:
-Ինչպես արդեն հայտարարվել է, Լեռնային Ղարաբաղից բռնի տեղահանված ընտանիքների դպրոցահասակ երեխաները անխոչընդոտ կերպով պետք է հաճախեն այն դպրոցներ, որոնք ունեն լիցենզիայով սահմանված տեղեր, անհրաժեշտ քանակությունը լրանալու դեպքում՝ նաև այլ դպրոցներ,- ասաց մարզի ղեկավարը: Նա նաև շեշտեց, որ Լեռնային Ղարաբաղից բռնի տեղահանված քաղաքացիների համաբուժարանային և ստացիոնար բուժօգնությունը ևս անվճար պետք է լինի:
-Առաջիկայում՝ կարիքների գնահատումից հետո, կփորձենք առկա ռեսուրսների սահմաններում լուծել նաև աշխատանքի տեղավորման խնդիրներ: Զուգահեռաբար աշխատանքներ են տարվում գործատուների հետ: Ամեն ինչ պետք է անենք մեր հայրենակիցների համար այս ծանր իրավիճակում նրանց հոգսը թեթևացնելու, օգնության ձեռք մեկնելու համար,- ասաց մարզպետը:
Մարզի ղեկավարը կոչ արեց բոլոր այն քաղաքացիները, ովքեր ինքնաբուխ կերպով են մարզ եկել և ապաստան գտել հարազատների տներում, անպայման այցելեն համայնքապետարաններ և ՄՍԾ-ներ՝ հաշվառվելու և կարիքների գնահատում անցնելու նպատակով, որպեսզի դուրս չմնան պետական աջակցության ծրագրերից:
Ընթացս քննարկվեցին մի շարք կազմակերպչական հարցեր, տրվեցին հանձնարարականներ:
Լոռու մարզպետի աշխատակազմ
