«Հայաքվե» նախաձեռնության անդամ, Վ, Բրյուսովի անվան համալսարանի պրոռեկտոր Ցոլակ Ակոպյանին Մայր բուհից կարմիր բերետավորները երեկ բերման էին ենթարկել: Նա այժմ ձերբակալված է:
Aravot.am-ը կապվեց Ցոլակ Ակոպյանի պաշտպան Սահակ Մանուկյանի հետ: «72 ժամով Ցոլակ Ակոպյանը ձերբակալված է, նոր զարգացումներ չկան, դեռ 24 ժամն էլ չի լրացել ձերբակալման: Եթե մեղադրանք առաջադրեն 72 ժամվա ընթացքում, ապա պիտի որոշվի նաեւ խափանման միջոցի հարցը, եթե չառաջադրեն մեղադրանք, 72 ժամը լրանալուց հետո պարոն Ակոպյանը կարող է վերադառնալ իր աշխատանքային պարտականությունների կատարմանը»։
Փաստաբանին հարցրինք՝ քաղաքական ենթատեքստ տեսնո՞ւմ է այս ամենում: «Իմ պրակտիկան ներկայացնեմ, մնացածը դուք եզրակացրեք. ես երբեւէ չեմ տեսել մի ցուցարարի կամ անձի, որն ինչ-որ հարցով անհանգստացած իր բողոքի ձայնն է բարձրացնում, իրեն որակեն որպես խուլիգան»,-ասաց Սահակ Մանուկյանը:
Մեկ օր առաջ Ցոլակ Ակոպյանն իր ֆեյսբուքի էջում գրել էր, որ գնում է հրապարակ, որպեսզի կարողանա նայել ընկերների եւ արցախցի ուսանողների աչքերին, նաեւ դիմելով գործընկերներին ու ուսանողներին՝ նշել էր . « Որեւէ մեկի մտքով չանցնի բռնանալ ձեր կամքին։ Հիշեցնում եմ տիկին նախարարի ապօրինի հանձնարարությունները կատարողներին՝ մարդուն հավաքներին մասնակցելուն խոչընդոտելը քրեական պատիժ է նախատեսում»։
Կարդացեք նաև
Գոհար ՀԱԿՈԲՅԱՆ
