Ազատության հրապարակից Նիկոլ Փաշինյանի հրաժարականի պահանջով այսօր՝ երեկոյան, սկսվեց Ազգային ժողովրդավարական բեւեռի աջակիցների երթը:
Նախքան երթը՝ Բեւեռի խորհրդի անդամ Ժիրայր Սեֆիլյանը ելույթ ունեցավ:
«Նորություն չէ, որ 44-օրյա պատերազմից սկսած մինչեւ այսօր պատերազմը չի կանգնել: Նոյեմբերի 9-ից հետո Ազգային ժողովրդավարական Բեւեռը կրկնում էր՝ այս ծանր վիճակից դուրս գալու ճանապարհը մեկն է՝ միջազգային խաղաղապահների մուտքը Արցախ եւ ՀՀ: Զգուշացրել ենք, որ մինչեւ այն ժամանակ, երբ Երեւանում ազգային քաղաքական գլուխ չի ձեւավորվել, շարունակվելու է մեր ընթացքը վատից վատ: Վերջին ընթացքում այդ ամենի ականատեսն ենք եղել: Մենք համախմբման կոչեր ենք արել, բայց մեր ժողովուրդը չուզեց տնից դուրս գալ, շարժվել, ինչ-ինչ բաների հավատաց:
Մեր վատ կանխազգացումը տեղի ունեցավ օգոստոսին, օգոստոսի երեքից հայտարարեցինք, որ որոշել ենք նորից հրապարակներ դուրս գալ՝ զգալով առաջիկա արհավիրքը: Այդ ժամանակից բարձրաձայնել ենք, որ մեզ հրապարակ դուրս բերողը Արցախում սպասվող վտանգն է, մեկ ամիս ամեն օր կանչել ենք մեր ժողովրդին եւ խնդրեմ. սեպտեմբերի 19-ին , 20-ին ստացանք վատից վատը: Սիրե՛լի ժողովուրդ, հիմա էլ ասում ենք, եթե առաջիկա օրերը այս հրապարակը լեփլեցուն չլինի, վատից վատ ենք լինելու, պետք է շարժվենք վերջապես: Փաշինյան կոչեցյալը ռուսական կողմի, ավելի ուշ ռուս-թուրքական կողմի թելադրանքով զբաղված է մի բանով՝ հնարավորինս խանգարել Արեւմուտքի մուտքը տարածաշրջան, որի պատճառով ստացանք ցեղասպանություն Արցախում: ՄԱԿ անվտանգության խորհրդի նիստից ժամեր առաջ Փաշինյանը հայտնում է այնպիսի մտքեր, որ հնարավորինս խանգարի Արեւմուտքի մուտքը տարածաշրջան: Նա ամեն օր, ամեն ժամ շարունակում է իր ցեղասպան գործունեությունն, ու մեր ժողովուրդը տակավին հանդուրժում է, զարթնի՛ր ժողովուրդ»,- իր ելույթում ասաց Սեֆիլյանը:
Կարդացեք նաև
Նա կոչ ուղղեց նաեւ ուսանողությանը՝ հորդորելով չվերադառնալ բուհեր, լցնել փողոցները, ակտիվ լինել:
Սեֆիլյանի ելույթից հետո նրա աջակիցները սկսեցին քայլերթը՝ Նիկոլ Փաշինյանի հրաժարականի պահանջով:
Ցույցի մասնակիցները նաեւ տեղեկացնում էին, որ հաջորդ ցեղասպանությունը լինելու է Սյունիքում եւ կոչ էին անում քաղաքացիներին դուրս գալ փողոցներ պայքարի ու դժոխքի վերածել Նիկոլ Փաշինյանի կյանքը:
Արփինե ՍԻՄՈՆՅԱՆ
