Երեւանի կենտրոնում անհնազանդության երթեր են: «Նիկոլ, դավաճան», «Արցախ» վանկարկումներով ցուցարարները փողոցներ են փակում: Փողոցներում տեսնելով ՔՊ-ի քաղաքապետի թեկնածու Տիգրան Ավինյանի ցուցապաստառները՝ «Ասեք՝ կանենք» կարգախոսով, բղավում էին՝ «եկե՛ք, ասենք»: Հետո, պոկելով Ավինյանի նկարը, որոշեցին վառել, ոչ մի կերպ ցուցապաստառը չայրվեց: Գցեցին գետնին ու սկսեցին տրորել:
Երթն առաջնորդում էր «Պատիվ ունեմ» խմբակցության ղեկավար Հայկ Մամիջանյանը: Որոշեցին Մյասնիկյան պողոտայով քայլել դեպի կենդանաբանական այգի: Երբ քայլերթի ժամանակ ցուցարարները հայտարարեցին՝ «թուրք Նիկոլին սիգնալ տուր», նրանց ազդանշաններով միացան բազմաթիվ վարորդներ: Մի ընտանիք, մեքենան փողոցում կանգնացնելով, մանկահասակ երեխայի հետ միացավ շարժմանը: Երթի մասնակիցները հայտարարում էին՝ «մեզ համար չկան սեւեր ու սպիտակներ, մենք բոլորս հայ ենք, որոնք պայքարում են իրենց վաղվա օրվա համար»:
Հետո կարմիր բերետավորները հրաման ստացան՝ բերման ենթարկել փողոցները փակողներին ու սկսեցին բիրտ ուժ կիրառելով՝ փողոցներից բերման ենթարկել ցուցարարներին: «Վերցրե՛ք սրան»,- գոռաց ոստիկաններից մեկը՝ հորդորելով բերման ենթարկել փողոցում կանգնած ցուցարարին: Մեկ ուրիշ ցուցարարի մեկ տասնյակից ավելի ոստիկաններով սկսեցին բռունցքներով գլխին հարվածել: «Մի՛ խփեք, արա, մեղք ա»,- բղավում էին ականատեսները:
Մյասնիկյան պողոտայում ցուցարարների երթը շարունակվում է:
Կարդացեք նաև
Հռիփսիմե ՋԵԲԵՋՅԱՆ
