«Մեր բոլորի համար շատ ծանր վիճակ է այսօր։ Երկրապահի հասցեին այս բառերն արտահայտողները․․․ Պատասխանելու բան էլ չկա դրան»,- Եռաբլուրում լրագրողներին ասաց ԵԿՄ Կենտրոնի բաժանմունքի ղեկավար եւ «Հանրապետություն» կուսակցության անդամ Ռոմիկ Մխիթարյանը՝ անդրադառնալով Եռաբլուրում զոհված զինծառայողների եւ ԵԿՄ-ականների միջեւ միջադեպին։
«Ինձ ասում են՝ ինչո՞ւ Ասկերանում չեք կանգնած։ Բա Կապանի սահմաննե՞րը, բա մեր Հայաստանի սահմաննե՞րը։ Իջնե՞նք գնանք Ասկերան։ Եթե դուք այդպես եք պատկերացնում, որ մենք կարող ենք մեր Հայաստանի դիրքերը թողնել, գնալ Ասկերան․․․ Լավ, գնանք, այնտեղ էլ կռվենք, խնդիր չկա, բա մեր դիրքերը հիմա ո՞վ պահի, հազարից ավելի մարդ կա հիմա դիրքերում կանգնած»,- ասաց Ռոմիկ Մխիթարյանը։
Նա հավելեց․ «Դուք էլ մեր հոգեկան վիճակը հասկացեք, թե մեզ համար ինչքան ծանր է։ Մեր ընկերներն են հիմա այնտեղ, մեր ընկերներին հեսա փորձելու են կոխել Բաքվի բերդերը։ Մենք դա շատ լավ հասկանում ենք։ Մենք հիմա մեր պարտականությունն ենք կատարում, մենք էլ մեր սահմաններն ենք պահում»։
Հարցին, թե ինչո՞ւ Արցախին օգնելու համար Հայաստանում զորահավաք չհայտարարվեց, Ռոմիկ Մխիթարյանը պատասխանեց․ «Այդ հարցերը զորահավաք հայտարարողին տվեք, մենք զորահավաք հայտարարող չենք»։
Կարդացեք նաև
Նա նշեց, որ Արցախի Պաշտպանության բանակի լուծարումից հետո զրոյից պետք է սկսել բանակ կառուցել, ինչպես 1988 թվականին եղավ։
Հարցին, թե եթե Արցախը ճանաչվի Ադրբեջանի կազմում, ինչպե՞ս են բանակ կազմավորելու, նա պատասխանեց․ «Այն ժամանակ էլ էր Ադրբեջանի կազմում։ Մենք ազատագրել էինք այդ ամեն ինչը, հլա մի բան էլ ավել։ Դե թող պահեին բոլոր իշխանությունները»։
Ռոզա ՀՈՎՀԱՆՆԻՍՅԱՆ
Նկարը՝ Ռոմիկ Մխիթարյանի ֆեյսբուքյան էջից
