Այսօր՝ սեպտեմբերի 21-ին, ՀՀ անկախության 32-րդ տարեդարձի օրը, վաղ առավոտից, Եռաբլուր պանթեոնում են հավաքվել 44-օրյա պատերազմում զոհվածների ծնողները, քաղաքական-հասարակական գործիչներ:
Հիշեցնենք, որ սեպտեմբերի 19-ին, կեսօրին, Ադրբեջանը «հատուկ օպերացիայի» անվան տակ կրկին հարձակվեց Արցախի վրա: Ադրբեջանական ագրեսիայի արդյունքում Արցախում 200 զոհ կա, վիրավորների թիվը հասնում է 400-ի: Երեկ ռուս խաղաղապահ զորախմբի միջնորդությամբ պայմանավորվածություն ձեռք բերվեց՝ կրակը դադարեցնելու մասին, իսկ այսօր Եվլախում կայանալու է Ադրբեջանի եւ Արցախի ներկայացուցիչների հանդիպումը:
«Որդիների կանչ» հասարակական կազմակերպության անդամները գիշերը եղել են Եռաբլուրում. «Մենք գիշերը լուսացրել ենք Եռաբլուրում, որպեսզի թույլ չտանք, որ այս ապիկարները ոտք դնեն այստեղ, որովհետեւ իրենք դրա իրավունքը չունեն: Իրենք Եռաբլուրի իմաստը չեն հասկանում, ձեւական գան, որ ի՞նչ»:
Կարդացեք նաև
Ծնողները լրագրողների հետ զրույցում տեղեկացրին, որ ողջ գիշերվա ընթացքում, ոչ էլ առավոտ կանուխ իշխանության ներկայացուցիչները չեն այցելել Եռաբլուր: Մի քանի պսակներ են միայն այս ընթացքում բերվել՝ դրվել:
Ծնողները՝ հաշվի առնելով ստեղծված իրավիճակը, կարծում են, որ Նիկոլ Փաշինյանը չի գնա Եռաբլուր: Պաշտոնական հաղորդագրություն՝ Նիկոլ Փաշինյանի՝ Եռաբլուր այսօր այցելության մասին չի հրապարակվել: Երեկ մեզ չհաջողվեց նաեւ Նիկոլ Փաշինյանի խոսնակից ճշտել՝ գնալու՞ է նա Եռաբլուր պանթեոն, թե՝ ոչ:
Նելլի ԳՐԻԳՈՐՅԱՆ
