Խոսելով ռուս-ուկրաինական պատերազմի արդյունքում առաջացած մի շարք համաշխարհային բարդությունների մասին՝ Արգենտինայի նախագահ Ալբերտո Ֆերնանդեսը նկատել է, որ այդ պատերազմի ֆոնին արձանագրվում է լարվածության աճ հասարակական պակաս ուշադրություն ունեցող, սակայն միջազգային խաղաղությունը ոչ պակաս խաթարող հակամարտությունների գոտիներում: Այս համատեքստում նախագահը բերել է Ադրբեջանի կողմից Բերձորի միջանցքի շրջափակման և սեպտեմբերի 19-ին սկիզբ առած Արցախի դեմ լայնածավալ ռազմական ագրեսիայի օրինակը:
«Կցանկանամ ընդգծել Ադրբեջանի կողմից Լաչինի միջանցքի շրջափակումը, որը հանգեցրել է մարդասիրական ճգնաժամի՝ կրկին պատժելով հայ ժողովրդին», – հայտնել է Արգենտինայի ղեկավարը:
Ֆերնանդեսը շարունակել է. «Հենց այսօր, երբ անցկացվում է այս ասամբլեան, լրահոսից տեղեկանում ենք, որ Ադրբեջանը ռազմական գործողություններ է սկսել՝ նպատակ ունենալով վերահսկողություն սահմանել Լեռնային Ղարաբաղի նկատմամբ»:
Անդրադառնալով, իր բնութագրմամբ, պակաս ուշադրության արժանացող խնդիրներին՝ նա շեշտել է, որ միջազգային հանրությունը չի կարող անտարբեր մնալ: «Պետք է կանխարգելիչ քայլեր ձեռնարկվեն՝ էթնիկ, ռասայական, կրոնական կամ քաղաքական հալածանքներից խուսափելու համար»: Հակամարտություններում ներգրավված ուժերին Ալբերտո Ֆերնանդեսը կոչ է արել իմաստություն դրսևորել և մասնակցել խաղաղ բանակցությունների:
Կարդացեք նաև
Արգենտինայի նախագահը արցախյան թեմային անդրադարձել էր նաև սեպտեմբերի 9-ին՝ Նյու Դելիում կայացած Մեծ քսանյակի գագաթնաժողովի շրջանակներում, որը վրդովվեցրել էր Բաքվին:
Արսեն ԱՅՎԱԶՅԱՆ
