ԵԱՀԿ Մինսկի խմբի ամերիկացի նախկին համանախագահ Ջեյմս Ուորլիքը Ամերիկայի ձայնի հայկական ծառայությանը տված հարցազրույցում նշել է, որ ռուսական կողմն ապացուցել է, որ տարածաշրջանում որպես խաղաղապահ վստահելի գործընկեր չէ: Ըստ նրա՝ ակնհայտ է, որ Մոսկվան ամբողջապես կլանված է այլ հարցով, իսկ նրա անգործությունը Լեռնային Ղարաբաղում որպես խաղաղապահ նորություն չէ կողմերի համար:
«Նրանց խաղաղապահները քիչ բան են արել խաղաղությունը պահպանելու համար: Իրականում, տարածաշրջանում խաղաղապահների կարիք կա, և նրանք պետք է կատարեն իրենց աշխատանքը, որպեսզի համաձայնագրի դրույթները իրականացվեն և խաղաղությունը պահպանվի»,- ասել է Ուորլիքը:
Մինսկի խմբի նախկին համանախագահի խոսքերով՝ Միացյալ Նահանգները պետք է առաջատար դեր ստանձնեն Ադրբեջանին բանակցային սեղանի շուրջ նստեցնելու հարցում: Նա բացառեց խնդրի ռազմական կարգավորումը՝ ընդգծելով՝ «մնացած հարցերը կարող են իրենց լուծումը գտնել խաղաղ ճանապարհով»։ Ըստ նրա՝ ԱՄՆ ջանքեր է գործադրում ոչ միայն հանրային դաշտում, այլ նաև կուլիսների հետևում՝ ձգտելով կողմերին նստեցնել բանակցային սեղանի շուրջ:
