«Ժամանակը, որը տրվել էր Նիկոլ Փաշինյանին, արդեն լրացել է: Նիկոլ Փաշինյանը Հայաստանի անվտանգության գլխավոր սպառնալիքն է եւ միայն նրա հեռացմամբ է հնարավոր Հայաստանի ու Արցախի լիակատար անվտանգություն։ Մենք այս պայքարը պետք է հասցնենք հաղթական ավարտին»,- կառավարության շենքի մոտ հայտարարեց ասաց «Մայր Հայաստան» դաշինքի առաջնորդ Անդրանիկ Թեւանյանը՝ հավաքվածներին հորդորելով՝ շարունակել մնալ Հանրապետության հրապարակում:
Նա նաեւ հավելեց, որ Հայաստանում իշխանափոխության գործընթացը պետք է մեկնարկի այն ճանապարհային քարտեզով, որը ներկայացրել է դաշինքը. «Կոչ եմ անում բոլոր մեր քաղաքացիներին մայրաքաղաքից ու մարզերից․ բոլորդ հավաքվեք Հանրապետության հրապարակում։ Իշխանության աղբյուրը ժողովուրդն է եւ նա իր ճնշմամբ պետք է իրականացնի իշխանափոխություն»: Նա նաեւ խորհրդարանում ներկայացված քաղաքական ուժերին առաջարկեց նախաձեռնել Նիկոլ Փաշինյանի իմպիչմենտի գործընթաց։
«Խորհրդարանական ու արտախորհրդարանական բոլոր ուժերը պետք է իրենց ջանքը ներդնեն, որ Նիկոլ Փաշինյանին հեռացնենք կառավարությունից եւ ձեւավորենք նոր՝ ազգային կառավարություն։ Մեր գլխավոր խնդիրը իշխանափոխությունն է։ Նիկոլ Փաշինյանը պետք է հեռացվի եւ դա Հայաստանի ժողովրդի որոշումն է»,-հայտարարեց Անդրանիկ Թեւանյանը՝ հավելելով, որ ստից ու կեղծիքից պետք է ազատվենք, որպեսզի կանգնեցնենք Հայաստանի ու Արցախի գահավիժումը։
Կարդացեք նաև
Ի դեպ, խաղաղ ցուցարարների դեպ ոստիկանության կիրառած հատուկ միջոցներից տուժել է նաեւ Անդրանիկ Թեւանյանը. նրա դեմքից արյուն էր հոսում:
Նելլի ԳՐԻԳՈՐՅԱՆ
Տեսանյութը՝ Արեգնազ Մանուկյանի էջից
