«Պատերազմական գործողությունները ֆեյսբուքյան գրառումներով կամ հայրենասիրական ելույթներով չեն դադարելու: Ռազմական գործողությունները նաեւ ուղեկցվում են հիբրիդային պատերազմին յուրահատուկ բաղադրիչներով: Ադրբեջանական կողմը տեղեկատվություն է տարածում, որ նախօրոք զգուշացրել էր ՌԴ խաղաղապահներին, որ իրականացվելու են գործողություններ, ՌԴ պատկան մարմիններն ասում են, որ դրա մասին իմացել ենք գործողություններից րոպեներ առաջ: Չմոռանանք, որ դրանով կարող է Ադրբեջանը նպատակ է հետապնդում սրել հայ-ռուսական հարաբերությունները եւ ավելի կասկածամիտ դարձնել երկու կողմերին»,- այսօր ԱԺ արտաքին հարաբերությունների հանձնաժողովի արտահերթ նիստում հայտարարեց ՔՊ խմբակցության պատգամավոր Գուրգեն Արսենյանը:
Ըստ Արսենյանի, այն հայտարարությունը, որը հնչեց ՌԴ ԱԳՆ խոսնակը, որ ՀՀ-ին ու Ադրբեջանին կոչ են անում մարտական գործողությունները դադարեցնել, հնարավոր է, որ ՌԴ իշխանություններին տրված ապատեղեկատվության արդյունք են, ապատեղեկացրել են, թե Հայաստանը մասնակցում է այդ գործողություններին:
Արսենյանը հայտարարեց. «Կոչ եմ անում բոլորիդ առաջնորդվել ՀՀ իշխանությունների հնչեցրած տեղեկատվությամբ: Հնչեց ՀՀ վարչապետի ուղերձը ՀՀ քաղաքացիներին, որտեղ մեզ ասաց, որ ՀՀ-ն արկածախնդրական քայլերի չի գնա: Մենք չպետք է բացառենք, որ սա կարող է նաեւ ՀՀ-ի համար նախապատրաստված թակարդ է: Բոլորով չգնանք ընկնենք մի բանի մեջ, որից հետո հայի հետին խելքով ասենք՝ ո՞նց մենք հայտնվեցինք այս վիճակում»: Արսենյանը նշեց, որ մարդկանց վրդովմունքն ու էմոցիաները հասկանալի են, սակայն մարտական գործողությունների ընթացքում էմոցիաներով առաջնորդվելու պարագայում մենք միայն կորուստներ կունենանք:
Կարդացեք նաև
Հռիփսիմե ՋԵԲԵՋՅԱՆ
