«Մենք ունենք սկզբունքներ, որոնց շրջանակներում պատրաստ ենք համագործակցել այլ ուժերի հետ, դրանք երեքն են. այդ ուժը պետք է հստակ գնահատական տա Նիկոլ Փաշինյանի իշխանությանը, պետք է որեւէ պարագայում հնարավոր չհամարի ՔՊ-ի հետ համագործակցությունը եւ պետք է կիսի ամբողջական իշխանափոխության մեր ծրագիրը»,- այսօր լրագրողների հետ հանդիպման ժամանակ ասաց «Մայր Հայաստան» դաշինքի առաջնորդ Անդրանիկ Թեւանյանը:
Անդրանիկ Թեւանյանը տեղեկացրեց, որ որեւէ ուժի հետ կոալիցիա կազմելու բանակցություններ չկան, իրենք դա կանեն իրենց հռչակած սկզբունքների շրջանակներում:
Հիշեցնենք, միավորման առաջարկ հնչել էր «Հանրային ձայն» կուսակցությունից:
Ինչ վերաբերվում է «Ազգային առաջընթաց» կուսակցության եւ Հայկ Մարությանի հետ համագործակցությանը՝ քաղաքապետի պաշտոնում դիտարկելով Հայկ Մարությանի թեկնածությունը, Անդրանիկ Թեւանյանն ասաց՝ կարող են օգնել Հայկ Մարությանին, որպեսզի նա ձայներ հավաքի՝ պայմանով, եթե նա կիսում է ամբողջական իշխանափոխության մասին դաշինքի սկզբունքը:
Կարդացեք նաև
Եթե հնարավոր համագործակցությունը տեղի ունենա, դաշինքը չի պատրաստվում պաշտոններ կամ վերահսկողական պաշտոններ վերցնել:
«Մայր Հայաստան» դաշինքի առաջնորդ Անդրանիկ Թեւանյանն այսօր հրավիրված մամուլի ասուլիսում ամփոփեց երեկ կայացած Երեւանի ավագանու ընտրությունները եւ ներկայացրեց դաշինքի հետագա անելիքները: Նրա համոզմամբ դաշինքի օգտին քվեարկած քաղաքացիներն առաջին լուրջ հարվածն են հասցրել իշխանական համակարգին, իսկ իրենց թիմն այժմ վերլուծում է այն պատճառները, որոնք նպաստեցին ընտրողների ցածր մասնակցության տոկոսին: Իր դիտարկմամբ, այս ընտրություններին մասնակցած ընտրողները լեգիտիմացրեցին իշխանության պարտությունը՝ ապացուցելով, որ երկմտել պետք չէր, պետք էր ակտիվ մասնակցել ավագանու ընտրություններին:
Հիշեցնենք, ըստ պաշտոնական տվյալների, ընտրությունների մասնակցողների թիվը կազմել է 28,5 տոկոս:
Դաշինքի ծրագրերը՝ Հայաստանում մինչեւ տարեվերջ հասնել իշխանափոխության, ձեւավորել ժամանակավոր կառավարություն, որը ոչ ուշ, քան մեկ տարվա ընթացքում կազմակերպելու է արտահերթ ընտրություններ, ուժի մեջ են մնում:
«Մեր հասարակության խնդիրն է՝ կոնսոլիդացված ապահովել ամբողջական իշխանազրկումը»,- հայտարարեց Անդրանիկ Թեւանյանը՝ հավելելով, որ մինչեւ տարեվերջ Հայաստանի եւ Արցախի հետ կապված դրամատիկ իրադարձություններ են սպասվում՝ հայ-ադրբեջանական հարաբերությունների համատեքստում եւ եթե գործող իշխանությունը մնա՝ ապա, մինչեւ տարեվերջ հնարավոր է այնպիսի գործընթացներ գնան, որոնք անշրջելի կլինեն:
Ինչ վերաբերվում են ընտրակեղծիքներին, դրանք դեռ ուսումնասիրվում են, արդյունքները եւ դրանց հիման վրա նախատեսվող քայլերը կներկայացվեն ավելի ուշ:
Այլ մանրամասները՝ տեսանյութում
Նելլի ԳՐԻԳՈՐՅԱՆ
