Հասարակական-քաղաքական գործիչ Էդգար Ղազարյանը «Հայելի» ակումբում վերլուծությունն այսօր սկսեց Բերձորով եւ Ակնայով դեպի Արցախ բացառապես «Կարմիր խաչի» մարդասիրական օգնության բեռներ անցնելուն գնահատական տալով:
«Ուշադրություն պետք է դարձնել, եւ դա կարեւոր է, որ Ադրբեջանի կողմից անցած օգնությունը «Կարմիր մահիկինը» չէ: Այսինքն, դա ադրբեջանական պարեն չէ, որ Աղդամի ճանապարհով գալիս է ոչ ադրբեջանական բեռ: Իսկ մեր կողմից, բնականաբար, գնում են հայաստանյան բեռները: Սա այն չէ, որ ասում են ադրբեջանական ինտեգրում: Սա այլ լուծում է, որով երկու ճանապարհով ոչ ադրբեջանական բեռներ են հասնում Արցախ:
Նաեւ անպայման պետք է արձանագրել, որ սա Հայաստանի իշխանությունների հետ որեւէ կապ չունեցող, Արցախի նոր իշխանությունների եւ ռուսական կողմի, մասնավորապես, խաղաղապահ առաքելության, հետ ուղիղ շփումների, ուղիղ փոխգործակցության արդյունք է: Արայիկ Հարությունյանը մնար Արցախի նախագահ՝ սա չէր լինելու: Եվ սա հույսեր է ներշնչում»:
Աշոտ ՀԱԿՈԲՅԱՆ
