«Ո՛չ: Ես կարծում եմ, պարզապես քաղաքական ընդդիմությունը հետ քաշվեց, որպեսզի իշխանությունը հերթական անգամ «նախկին-ներկա» չխաղա»,-այսպես լակոնիկ պատասխանեց քաղտեխնոլոգ Կարեն Քոչարյանը Aravot.am-ի այն հարցին, թե չե՞ք կարծում, որ ընդդիմության հիմնական երկու ուժերը փաստացի տապալեցին ընտրությունները` մեկը թույլ թեկնածուով, մյուսը չեզոք կեցվածքով:
Մեր ճշտող հարցին, թե արդյոք ընդդիմությունը մի տեսակ անտերության չմատնեց իր ընտրազանգվածին, ու մեծամասնությունը, պարզապես չիմանալով ո՞ւմ ընտրի, գերադասեց չգնալ ընտրատեղամաս, քաղտեխնոլոգը պատասխանեց. «Միգուցե դա էլ է եղել, բայց ես չեմ կարծում, որ միայն դա է եղել»:
Անդրադառնալով քաղաքացիների մասնակցության աննախադեպ ցածր ցուցանիշին՝ Կարեն Քոչարյանն ասաց. «Իհարկե, բացատրում են իբր հասարակության ապատիայով, դեպրեսիայով, անտարբերությամբ, այնինչ ընտրություններին քաղաքացիների ցածր մասնակցությունը խոսում է այն մասին, որ ժամանակակից գոնե Հայաստանում, գուցե նաև աշխարհում, մարդիկ կարծում են, որ ընտրությունները իշխանություն ձևավորելու մեթոդ չեն այլևս, կամ առնվազն՝ այսպիսի ընտրությունները, գուցե ուրիշ բան է պետք մտածել: Ինչպես Չերչիլն է ասել. «Դեմոկրատիան ղեկավարման ամենավատ ձևն է, բայց ավելի լավ ձև մարդկությունը դեռ չի հորինել»: Գուցե այլ բան մտածեն, օրինակ՝ պոպուլիզմ, ինչն ի սկզբանե մտածել էր այս իշխանությունը»:
Լուսինե ՄԱՐԳԱՐՅԱՆ
