Քիչ առաջ ՀՀ ՆԳՆ ոստիկանության շտաբի պետ Արմեն Մկրտչյանը ՀՀ կենտրոնական ընտրական հանձնաժողովի սրահում ամփոփիչ ասուլիսով հանդես եկավ՝ ներկայացնելով ոստիկանությանը հղված հաղորդումները։
Պաշտոնյան ասաց, որ այսօր Երևանի ավագանու ընտրությունները մեկնարկելուն պես՝ ժամը 8․00-ից մինչ այս պահը ոստիկանությունը ստացել և քննարկել է ստուգման ենթակա երեք տեղեկություն, որոնցից մեկը երկու մեքենաներով ճանապարհը փակելու, մյուսը՝ մտավոր խնդիրներ ունեցող որդու տվյալներն ընտրացուցակում հայտնվելու մասին են։
Երրորդ հաղորդումն էլ անհայտ քաղաքացուց է այն մասին, որ հանձնաժողովի անդամը մարդ է բերում ընտրատեղամաս՝ ընտրություն կատարելու։ Ըստ բանախոսի, նշված ահազանգերով կատարվում են ստուգողական աշխատանքներ։
Ոստիկանության պաշտոնյան մանրամասներ կհաղորդի ժամը 20․30-ին, նա մեկ անգամ ևս ընտրություններից հետո կհյուրընկալվի ԿԸՀ-ում։
Կարդացեք նաև
Դիտորդական առաքելություն իրականացնող կազմակերպություններից մեկի այն ահազանգին, թե Քանաքեռ- Զեյթուն համայնքում ակտիվություն է նկատվում քրեական հեղինակությունների հետ համագործակցող մարդկանց կողմից, նրանք շրջում են ընտրատեղամասերով, հարակից տարածքներով, զրուցում ինչ-որ մարդկանց հետ, իր մոտ դեռ տվյալներ առկա չեն։ Սակայն պաշտոնյան հավաստիացրեց, որ պարտադիր կիրականցվեն ստուգողական աշխատանքներ։
Արմեն Մկրտչյանը տվյալներ ներկայացրեց նախընտրական քարոզարշավի ընթացքում ոստիկանությանը հասցեագրված հաղորդումների մասին։
«Նախընտրական ժամանակաշրջանում՝ քարոզարշավի ընթացքում, այն է՝ օգոստոսի 23-ից մինչև սեպտեմբերի 16-ը ոստիկանությունում ստացվել և քննարկվել են 26 հաղորդումներ, որոնցից 8-ը առերևույթ հանցագործության հատկանիշներ պարունակող, իսկ 18-ը՝ ստուգման ենթակա այլ տեղեկություններ։
Հանցագործության մասին ստացված բոլոր 8 հաղորդումներն ուղարկվել են ՀՀ Քննչական կոմիտե՝ քրեական վարույթ նախաձեռնելու հարցը քննարկելու համար։ Դրանցից 7-ով նախաձեռնվել են քրեական վարույթներ, իսկ մեկով կազմվել է քրեական վարույթ չկազմելու մասին արձանագրություն, որի օրինականությունն էլ ստուգվել է հսկող դատախազի կողմից։
Ստուգման ենթակա 19 հաղորդումներից 2-ն առերևույթ հանցագործության և այլ իրավախախտման հատկանիշներ չպարունակելու հիմքով թողնվել են անհետևանք, իսկ 17-ով դեռևս կատարվում են ստուգումներ։ Վարչական խախտումների վերաբերյալ հաղորդումներ դեռևս չեն ստացվել», ասաց ոստիկանության պաշտոնյան։
Նրա տեղեկացմամբ՝ հանցագործություններից 4-ը եղել են քարոզչությանը խոչընդոտելու դեպքեր, 2-ը՝ գույքը ոչնչացնելու կամ վնասելու, մեկը՝ հավաք անցկացնելուն կամ դրան մասնակցելուն խոչընդոտելը կամ հարկադրելը, և մեկն էլ՝ ընտրական իրավունքին խոչընդոտելը։
3 հաղորդում ստացվել են Մալաթիայի, երկուսը՝ Կենտրոն և Նոր Նորք, երրորդը՝ Շենգավիթ վարչական տարածքներից։
Նունե ԱՐԵՎՇԱՏՅԱՆ
