Երեւանի ավագանու 2023 թվականի սեպտեմբերի 17-ի ընտրությունների նշանակման օրից մինչ ընտրությունների օրը կենտրոնական ընտրական հանձնաժողովը ստացել է Երեւանի ավագանու ընտրություններին առնչվող 101 դիմում։ Այդ դիմումներից 14-ը կուսակցությունների եւ կուսակցությունների դաշինքի կողմից ներկայացված ընտրական ցուցակները գրանցելու պահանջով դիմումներն են, որոնք բավարարվել են։
«45 դիմում վերաբերել են հավատարմագրման գործընթացին, որոնցից 40-ը ներկայացվել է տեղական ԶԼՄ-ների կողմից, եւ թվով 5 դիմումները վերաբերել են դիտորդական առաքելություն իրականացնելու համար հասարակական կազմակերպությունների հավատարմագրմանը: Դրանցից 3-ը՝ տեղական կազմակերպություններից են ներկայացվել, իսկ երկուսը՝ միջազգային կազմակերպություններից: Որեւէ դիմում չի մերժվել: Բոլոր դիմումատուների դիմումները բավարարվել են, եւ բոլոր ԶԼՄ-ներն ու կազմակերպությունները հավատարմագրվել են»,- ասուլիսում նշեց ՀՀ կենտրոնական ընտրական հանձնաժողովի իրավաբանական վարչության պետ Լիլիա Հակոբյանը։ 6 դիմում եղել է ինքնաբացարկի վերաբերյալ, 12 դիմում վերաբերել են տեղեկատվության հարցմանը։
Դիմումներ են ստացվել նաեւ ընտրություններին մասնակցող կուսակցությունների եւ կուսակցությունների դաշինքի կամ նրանց լիազոր ներկայացուցիչների կամ նրանց ցուցակում ընդգրկված թեկնածուների կողմից: 6 դիմում ներկայացվել է Երեւանի ավագանու ընտրություններին համատեղ դիտորդական առաքելություն իրականացնող ՀԿ-ների կողմից, եւ թվով հինգ դիմում ներկայացվել է քաղաքացիների կողմից:
«Մեկ դիմումով նշվում էր, որ անհայտ անձինք են գրանցվել մի հասցեում եւ, քանի որ ընտրողների ցուցակներով զբաղվում է ոստիկանությունը, ապա նրան է հասցեագրվել այդ դիմումը: Մեկ դիմումով պահանջվում էր պարզաբանել, թե արդյոք օրենքին համապատասխան են իրականացվել նախընտրական հիմնադրամներից կատարվող ծախսերը: Այդ հարցն առաջացել էր կուսակցությունների եւ դաշինքի կողմից տրամադրված հայտարարագրերը հրապարակելուց հետո: ԿԸՀ-ն միջոցներ է ձեռնարկել եւ առկա տեղեկատվությունն այդ կապակցությամբ ներկայացրել է, ընդ որում՝ մատնանշվել է, որ խախտում առկա չի եղել: Մնացած դիմումներն առնչվել են նախընտրական քարոզչության սահմանած կարգի պահպանությանը, որոնց դեպքում նյութերը կամ ուղարկվել են իրավապահ մարմիններին, կամ մյուս դեպքերում ԿԸՀ-ն ձեռնարկել է օպերատիվ միջոցներ՝ պարզելու ներկայացված հանգամանքները, թե արդյոք առկա են խախտումներ: Եղել է իրավիճակ, երբ ԿԸՀ-ն արձանագրել է խախտում, սակայն միջոցներ ձեռնարկելու պահին խախտումը արդեն վերացված է եղել, ուստի դրա վերաբերյալ դիմումատուն իրազեկվել է»,- նշեց ԿԸՀ-ի ներկայացուցիչը։
Կարդացեք նաև
ԿԸՀ էլեկտրոնային հասցեին եւս դիմումատուները ուղարկում են նամակներ, որոնց վերաբերյալ կատարվում է ուսումնասիրություն, եւ պատասխանները տրվում են դիմումատուներին: Այս ժամանակահատվածում եղել է նման 14 նամակ, պատասխանները հրապարակված են նաեւ ԿԸՀ կայքում:
Արմեն ԴԱՎԹՅԱՆ
