«Նրանք, ովքեր Հայաստանի Հանրապետության քաղաքացիներ չեն, բայց վերջին մեկ տարում հաշվառված են տվյալ համայնքում՝ իրավունք ունեն տեղական ինքնակառավարման մարմինների ընտրության ժամանակ քվեարկել»,-ասուլիսում նշեց ՀՀ կենտրոնական ընտրական հանձնաժողովի քարտուղար Արմեն Սմբատյանը։ Այդ անձանց համար անձը հաստատող փաստաթուղթ է համարվում ՀՀ կողմից տրված կացության քարտը։
Այսօր՝ սեպտեմբերի 17-ին Երեւանում ավագանու համամասնական ընտրություններ են․ 10 ընտրատարածքներում ձեւավորվել են 475 տեղամասեր։
«Ինչ վերաբերում է Հայաստանի Հանրապետության քաղաքացիներին, ապա նրանք տվյալ համայնքում պետք է վերջին վեց ամսում ունենան հաշվառում, որպեսզի ընդգրկված լինեն ընտրողների ցուցակում ու կարողանան քվեարկել»,-նշել է ԿԸՀ քարտուղարը։
Ըստ ՀՀ ներքին գործերի նախարարության տվյալների՝ Երեւանի ավագանու ընտրություններին մասնակցելու իրավունք ունեցող քաղաքացիների թիվը 824 հազար 250 է։
Կարդացեք նաև
Ընտրություններին մասնակցում է 14 քաղաքական ուժ՝ 13 կուսակցություն եւ 1 դաշինք։ Մասնակցող ուժերն են՝ «Հայաստանի եվրոպական», «Ժողովրդավարական համախմբում», «Քաղաքացիական պայմանագիր», «Հանուն սոցիալական արդարության», «Ուժը հայրենյաց», «Հանրային ձայն», «Ազգային առաջընթաց», «Հաղթանակ», «Ապրելու երկիր», «Հանրապետություն», «Միացյալ Հայաստան», «Արդար Հայաստան», «Լուսավոր Հայաստան» կուսակցությունները եւ «Մայր Հայաստան» (կազմում՝ «Երկիր ծիրանի» եւ «Ինտելեկտուալ Հայաստան» կուսակցությունները) դաշինքը։
Արմեն ԴԱՎԹՅԱՆ
