168․am – Հայաստանը Հռոմի կանոնադրությունը (ստատուտ) վավերացնելու շուրջ ստեղծված իրավիճակի վերաբերյալ առաջարկներ է ուղարկել Ռուսաստանին, այս պահին քննարկում է ընթանում։ ՏԱՍՍ–ին տված հարցազրույցում այս մասին ասել է ՀՀ հատուկ հանձնարարություններով դեսպան Էդմոն Մարուքյանը։
«Ինչ վերաբերում է Հռոմի ստատուտին, ապա ես` որպես տեղեկացված մարդ, կարող եմ ասել, որ Ռուսաստանի Դաշնությանն այդ կապակցությամբ առաջարկ է արվել, հանդիպում է տեղի ունեցել, և աշխատանքն ընթանում է։ Պարզ է, որ Հռոմի ստատուտը վավերացվում է ոչ թե ՌԴ–ի դեմ, այլ Հայաստանի Հանրապետության տարածքում ադրբեջանական կողմի կատարած պատերազմական հանցագործությունների պատճառով։ Մեր ռուս գործընկերները քաջատեղյակ են այդ մասին։ Դրանք պետք է դառնան միջազգային քրեական հետապնդման առարկա»,- ասել է Մարուքյանը։
Նա նշել է, որ ՀՀ արտգործնախարարությունը Ռուսաստանի արտաքին քաղաքական գերատեսչության բողոքի նոտային կպատասխանի ընթացակարգերի համաձայն։ Անդրադառնալով այդ ֆոնին հայ-ամերիկյան զորավարժությունների անցկացմանը` Մարուքյանը շեշտել է` դրանք անցկացվում են խաղաղապահ առաքելության շրջանակում։
«Առաջին անգամ անցկացվել են 2011 թվականին, բայց այն ժամանակ հարցեր չեն առաջացել։ Սրանք առաջին զորավարժությունները չեն և խաղաղապահ առաքելության շրջանակում են անցկացվում, որոնց մասնակցում է նաև մեր երկիրը»,– ասել է հատուկ հանձնարարություններով դեսպանը։
Կարդացեք նաև
Հիշեցնենք` Հայաստանը Միջազգային քրեական դատարանի Հռոմի կանոնադրությունը ստորագրել էր 1999թ․–ի հոկտեմբերի 1-ին, սակայն չէր վավերացրել։ Գործընթացն ընդհատվել էր 2004 թ․–ի օգոստոսի 13-ին, երբ փաստաթուղթը ճանաչվել էր ՀՀ Սահմանադրությանը հակասող։
Հաշվի առնելով, որ այդ ժամանակից ի վեր Սահմանադրությունը երկու անգամ փոփոխվել է` Նիկոլ Փաշինյանի կառավարությունը որոշեց վերսկսել միջազգային պայմանագրի վավերացման գործընթացն ու այդ նպատակով ևս մեկ անգամ դիմել ՍԴ։
