ՔՊ երթից առաջ լրագրողները հարցրեցին ԱԺ նախագահ Ալեն Սիմոնյանին՝ ՔՊ-ն վախենո՞ւմ է ինչ-որ բանից, որ մեծ թվով ոստիկանական ուժեր է կենտրոնացրել երթը հսկելու համար։ «Չեմ հասկանում ձեր հարցը, գնացեք, վերախմբագրեք ձեր հարցը, վերադարձեք, այստեղ եմ»,- ասաց նա։
Ալեն Սիմոնյանը հավելեց, որ շատ մարդիկ վերադառնում են աշխատանքից, խցանումներ են, եւ ճանապարհային երթեւկությունը հսկվում է ոստիկանների կողմից։ Հարցին, դա պայմանավորվա՞ծ է այն հանգամանքով, որ երթին մասնակցում է նաեւ Նիկոլ Փաշինյանը, Ալեն Սիմոնյանը պատասխանեց․«Նիկոլ Փաշինյանը ՀՀ արդար ընտրություններով ընտրված վարչապետն է եւ գլխավոր հրամանատարը։ Կարծում եմ՝ հարցն ինքնին սխալ ենթատեքստ ունի։ Ես էլ շատ դժվարությամբ եկա, եւ գաղտնիք չէ, որ Երեւանը շատ ծանրաբեռնված է»,- ասաց նա։
Հարցին, թե մտավախություն չունե՞ն, որ սադրանքներ կլինեն, Ալեն Սիմոնյանը պատասխանեց․«Գիտեք ինչ, սադրանքներ արտաքին թշնամու կողմից, հակառակորդի կողմից որեւիցե քայլ չենք բացառում, մենք ընենց բաներ ենք մեր պատմության ընթացքում տեսել, որ ո՞նց կարելի է որեւէ բան բացառել: Առավել եւս, երբ ողջ իշխանությունը մի տեղում է գտնվում, բնական է եւ շատ կարեւոր է, որ անվտանգությունն ապահովված լինի»։ Ալեն Սիմոնյանը հավելեց, որ ներսում էլ կարող է թշնամի լինել, որը կարող է ինչ-որ բան փորձել անել։ «Մեռան արյուն թափելուց խոսելով: Մեր ընդդիմադիր գործընկերներն Ազգային ժողովում արյուն թափելուց են խոսում, հիմա եկել ինձ հարցնում եք՝ էսքան ոստիկան խի՞ է եկել: Հլը գնացեք իրենց հարցրեք՝ այդ ի՞նչ արյան մասին են խոսում»:
Հարցին, որ տեղեկություններ կան, թե մարզերից մեծ թվով մարդիկ են ավտոբուսներով բերվել Երեւանի այսօրվա երթին, Ալեն Սիմոնյանը պատասխանեց․ «Շրջեք մարդկանց մեջ, հարցրեք, եթե կլինեն, լուսաբանեք։ Ես ըտենց բաներից տեղյակ չեմ, սեփական մտածելակերպը դիմացինին վերագրելը շատ սխալ բան է»։ Ալեն Սիմոնյանը հավելեց, որ կարծում է՝ երեւանցին ճիշտ ընտրություն կանի եւ իրենց վստահության քվել կտա։ «Եվ մենք առաջին տեղով կանցնենք: Այսօրվա ընտրությունները շատ կարեւոր են, որովհետեւ այս ընտրությունները ոչ միայն քաղաքի մասին են, այլ այն արտաքին վտանգների, որոնք այսօր մեզ սպառնում են»:
Կարդացեք նաև
Մարզերից եկածների հարցազրույցները՝ տեսանյութում
Ռոզա ՀՈՎՀԱՆՆԻՍՅԱՆ
