Քախտեխնոլոգ Վիգեն Հակոբյանի եզրահանգմամբ, Երեւանի ավագանու ընտրություններին մասնակցող 14 քաղաքական ուժերից շեմը հաղթահարել կկարողանան չորսը կամ հինգը: Նրանք են «Քաղաքացիական պայմանագիր», «Ապրելու երկիր», «Ազգային առաջընթաց» կուսակցությունները, «Մայր Հայաստան» կուսակցությունների դաշինքը, որն ի սկզբանե խնդիր էր դրել ոչ թե հաղթելու, այլ ամբողջական իշխանափոխության համար լուրջ հիմք դնելու: Իսկ հինգերորդը լինելուն հավակնում են երկու-երեք ուժեր:
Վկայակոչելով սոցիալական հարցումների արդյունքները, քաղտեխնոլոգը նշեց, որ դժվար թե որեւէ կուսակցության հաջողվի միայնակ 50+1 տոկոս ձայն հավաքել, ուստի գործը մեծ հավանականությամբ կարող է հասնել կոալիցիա ձեւավորելու շուրջ բանակցություններին: Եվ այստեղ արդեն շատ բան կախված է լինելու պոտենցյալ հաջողակ ուժերից, որոնք, ըստ էության, ներկայացնելու են ընդդիմադիր թեւը:
Վիգեն Հակոբյանը նույնպես համոզված է, որ ավագանու ընտրություններին քիչ մասնակցությունը ձեռնտու է իշխող քաղաքական ուժին, եւ այդպես մեծանում է իշխանության վերարտադրվելու հավանականությունը, որը վարչական ռեսուրսների կիրառմամբ կարողանում է ապահովել իր ընտրողների մասնակցության տոկոսը եւ մեծացնել քվեների թիվը:
Քաղտեխնոլոգի մեկնաբանմամբ, նրանք, ովքեր չեն մասնակցելու ընտրությանը, ակամա աջակցելու են իշխանությանը: Այնպես որ, ըստ Վիգեն Հակոբյանի՝ հատկապես այն երեւանցիների համար, որոնք դեմ են այս իշխանությանը, մասնակցությունը անհրաժեշտ է:
Կարդացեք նաև
Աշոտ ՀԱԿՈԲՅԱՆ
