Ինչպես տեղեկացրել ենք, այսօր վաղ առավոտից բողոքի ցույցի էին դուրս եկել Շիրակի մարզի Ախուրյան խոշորացված համայնքի Գետք գյուղի բնակիչները՝ պահանջելով չփակել իրենց դպրոցը։ Նրանց տեղեկություններ էին հասել այն մասին, որ Գետքի դպրոցը միավորվելու է հարևան գյուղի՝ Երազգավորսի դպրոցի հետ, ինչին նրանք կտրականապես դեմ են։
Բնակիչների հետ հանդիպել էր Շիրակի մարզպետի աշխատակազմի կրթության, մշակույթի և սպորտի վարչության գլխավոր մասնագետ Գևորգ Ղումաշյանը և քաղաքաշինության, հողաշինության և ենթակառուցվածքների կառավարման վարչության պետ Խաչատուր Խնձրցյանը։
Գևորգ Ղումաշյանը Aravot.am-ի հետ զրույցում ասաց, որ Գետքի դպրոցն այս պահին չի փակվում, բնակիչները լիարժեք տեղեկացված չեն, այդ պատճառով էլ բողոքի ցույց են անցկացրել։
Ըստ Գևորգ Ղումաշյանի, բնակիչներին անհանգստացրել է ԿԳՄՍ նախարար Ժաննա Անդրեասյանի՝ սույն թվականի սեպտեմբերի N 11-ի 1790 Ա/2 հրամանը, որը «ՀՀ կրթական որակյալ ծառայությունների ապահովման հասանելիության ծրագրում ներառված պետական հանրակրթական ուսումնական հաստատությունների ցանկը» հաստատելու մասին է։
Կարդացեք նաև
Որակյալ կրթություն ապահովելու նպատակով ՀՀ 232 դպրոցների ցանկ է ներառված, դրանցից 48-ը Շիրակի մարզի դպրոցներ են։ Սրանով մեկնարկվում է ծրագիրը։
«Մենք բնակիչներին խնդրել ենք իրենց առաջարկությունները, դժգոհությունները ներկայացնել գրավոր, որը կամփոփվի և կներկայացվի Երևան՝ համապատասխան ատյաններ», – ասաց Գևորգ Ղումաշյանը։
Ծրագիրն, ամենայն հավանականությամբ, կյանքի կկոչվի 2026-2027 ուստարում, Գետքի բնակիչներին, սակայն, թվացել է՝ այն հենց այս պահին պիտի իրագործվի։
Բնակիչներն արձագանքել են և պատրաստակամություն հայտնել գրավոր ներկայացնել առաջարկները Շիրակի մարզպետի աշխատակազմ։
Գևորգ Ղումաշյանի խոսքով՝ Գետքի բնակիչների հետ զրուցելուց հետո նրանք դադարեցրել են բողոքի ակցիան, դպրոցում դասապրոցեսը վերականգնվել է։
Նունե ԱՐԵՎՇԱՏՅԱՆ
